Politoloq: Dinc aksiyalara siyasi don geyindirməyə çalışanlar istəklərinə nail ola bilməyəcəklər
Bakı, 29 dekabr, AZƏRTAC
Xankəndi-Laçın yolunda Azərbaycanın vətəndaş cəmiyyəti üzvlərinin ölkənin faydalı qazıntı yataqlarının qanunsuz istismarına və ekoloji terrora qarşı dinc formada etiraz aksiyaları artıq iki həftədən çoxdur ki, davam edir. Bu müddət ərzində baş verən dinc aksiyalara müxtəlif siyasi don geyindirmək istəyən mənfur qüvvələr öz istəklərinə nail ola bilməyəcəklər.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri, politoloq Xəyal Bəşirov deyib.
Politoloq diqqətə çatdırıb ki, hazırkı vəziyyətdən ən çox yararlanmağa çalışan Qarabağda qanunsuz yerləşən cinayətkar və qondarma rejimin legioneri Ruben Vardanyan adlı qaranlıq keçmişi olan kriminal milyarderdir. Rusiya vətəndaşlığından imtina edərək Qarabağa gələrkən Ermənistanda hakimiyyətə gəlmək niyyətini gizlətmək üçün Xankəndidə olan ermənilərə görə həyatını və biznesini riskə atması və heç bir dövlət postu tutmaq istəmədiyi barədə “Forbes” jurnalına müsahibə də vermişdi. Ancaq bütün həyatı qaranlıq və yalanlardan ibarət bu cinayətkar erməni özünü olmayan bir qurumun dövlət naziri kimi təqdim edir.
"Heç kimə sirr deyil ki, Vardanyan Qarabağa ezam edildikdən sonra orada baş verən qanunsuz proseslərə də onun ciddi təsiri var. Belə ki, qanunsuz biznesini daha da genişləndirmək üçün sülhməramlı kontingentin nəzarəti altında olan ərazilərdə Azərbaycana aid faydalı qazıntı yataqlarını daha sürətlə istismar etməyə tələsir. Sülhməramlılardan özünə və qanunsuzluqlarına görə qalxan kimi istifadə edən qondarma rejim və onun legioneri Vardanyan, əslində, bu prosesə Azərbaycan tərəfinin reaksiyasını bildiyinə görə bu addımları atdı.
Hesab edirəm ki, vətəndaş cəmiyyətimizin etiraz aksiyaları başlamamışdan əvvəl müxtəlif yollarla Ermənistandan Xankəndiyə gətirdikləri insanların iştirakı ilə mitinqlər keçirmək planı da qabaqcadan düşünülmüş bir təhlükəli gedişdir. Əslində, bununla bir çox hədəflərə nail olmaq istəyən qondarma rejim, həm də dünyanın diqqətini regiona və Azərbaycanın ermənilərə humanitar problem yaratması ilə bağlı süni görüntülərə cəlb etmək istəyir", - deyə X.Bəşirov qeyd edib.
Onun sözlərinə görə, bir tərəfdən 30-40 dollara möhtac saxlanılmış insanlara pul vəd etməklə, digər tərəfdən isə Xankəndidəki erməniləri özləri humanitar təcrid vəziyyətində saxlayaraq buna səbəb kimi Azərbaycanı göstərməklə mülki şəxsləri və hətta azyaşlı uşaqları belə mitinqlərə toplamağa çalışırlar. Əslində isə, Azərbaycan açıq şəkildə bütün dünyaya nümayiş etdirir ki, yol bağlanmayıb, humanitar məqsədlərlə hər iki istiqamətdə müvafiq nəqliyyatın hərəkəti mövcuddur. Bu yolla Azərbaycan tərəfi onların bu oyununu pozsa belə, yalan və təxribatla zəngin erməni maşını dayanmaq bilmir.
Politoloq vurğulayıb ki, qondarma rejimin əsas qorxularından biri də, Prezident İlham Əliyevin və rəsmi Bakının dəfələrlə Qarabağdakı ermənilərin Azərbaycan vətəndaşları olmaları ilə bağlı mövqe bildirməsi ilə əlaqədardır. Azərbaycan xalqının tərkib hissəsi kimi, həmin insanların mövcud həqiqətləri bir gün tam anlayacaqlarını, ekoloji terrorun, eyni zamanda, onlara qarşı törədildiyini dərk edib azərbaycanlı etirazçılara qoşulacaqlarından ciddi şəkildə narahat olurlar.
"Əslində, bizim həm dövlət, həm də xalq olaraq istəyimiz ondan ibarətdir ki, Qarabağda bu günə qədər baş verən və bundan sonra da cərəyan edəcək proseslərlə bağlı həqiqətləri orada yaşayan erməni əsilli vətəndaşlarımız da anlasınlar", - deyə X.Bəşirov bildirib.
Bölmənin digər xəbərləri
