Politoloq: Ermənistan rəhbərliyinin əsas hədəflərindən biri regionu tamamilə eskalasiya vəziyyətinə gətirməkdir
Bakı, 14 sentyabr, AZƏRTAC
Sərhəddə davam edən genişmiqyaslı hərbi təxribatların arxasında Ermənistan hakimiyyətinin sülh danışıqlarını sabotaj etmək niyyəti dayanır. Hadisələrin məhz Brüssel danışıqlarının səmərəli nəticələr doğurduğu bir dövrə təsadüf etməsi bu ehtimalları daha da gücləndirir. Məlum olduğu kimi, avqustun 31-də Brüsseldə əldə olunan razılaşmaya əsasən, XİN rəhbərləri səviyyəsində sülh müqaviləsinin mətninin müzakirə edilməsi nəzərdə tutulurdu. Bu, son dərəcə mühüm bir addım olmaqla, danışıqların müsbət sonluqla yekunlaşacağına dair böyük ümidlər yaradırdı. Lakin hazırda baş verən hadisələr bu görüşün yaxın vaxtlarda baş tutmaq ehtimalını tamamilə istisna edir.
Bu fikirləri AZƏRTAC-a açıqlamasında politoloq Ceyhun Əhmədli söyləyib.
O qeyd edib ki, Ermənistan hakimiyyəti öz təxribatçı addımları ilə süni şəkildə münaqişə görüntüsü formalaşdıraraq “status” məsələsini yenidən danışıqların gündəliyinə gətirmək istəyir. Minsk qrupu məfhumunun son vaxtlar tez-tez gündəmə gətirilməsi də bu baxımdan, təsadüfi deyil. Yəni, hər bir detal sanki əvvəlcədən planlaşdırılmış ssenarinin tərkib elementi kimi diqqəti cəlb edir. Sözsüz ki, Ermənistan rəhbərliyinin əsas hədəflərindən biri KTMT-ni qarşıdurmaya cəlb etməklə regionu tamamilə eskalasiya vəziyyətinə gətirməkdir. Təxribatların demək olar ki, bütün sərhədboyu miqyas alması və ağır artilleriyadan intensiv şəkildə istifadə olunması bu məqsədə xidmət edir. Rəsmi İrəvan əvvəlcədən əmin idi ki, Azərbaycan bu təxribatların qarşısında səssiz qalmayacaq və ən sərt addımlarla cavab verəcək. Ermənistan isə bunu qarşı tərəfin aqressiyası kimi təqdim edərək, KTMT-nin müdaxiləsi üçün öz aləmində legitimlik qazandırmağı hədəfləyirdi. Amma umduğunu əldə edə bilmədi. Belə ki, ardıcıl müraciətlərə baxmayaraq, həm KTMT, həm də onun dominant ölkəsi hesab olunan Rusiya neytral mövqe sərgiləməklə Ermənistanı yenə məyus etdi.
“Təəssüf ki, regionda eskalasiya şəraitinin olmasında maraqlı olan beynəlxalq siyasi dairələr də mövcuddur. Əlbəttə, Ermənistanın müstəqil siyasət yürüdən aktor olmadığını nəzərə alsaq, həmin dairələrin rəsmi İrəvanı təxribata təhrik etmək niyyətlərini istisna edə bilmərik. Qırx dörd günlük Vətən müharibəsinin nəticəsində yaranmış yeni reallıqlar şəraitində regiondakı bütün təsir imkanlarından məhrum olan bəzi xarici mərkəzlər münaqişə vəziyyətinin yenidən bərqərar olmasında maraqlıdırlar. Çünki münaqişə hər hansı bir regionda təsir imkanı əldə etməyin ən arzuolunan vasitəsidir.
Bütün hallarda məsuliyyət Ermənistanın hərbi-siyasi rəhbərliyinin üzərinə düşür. Ermənistan odla oynamağı dayandırmalıdır. İkinci Qarabağ müharibəsi dəmir yumruğumuzun qüdrətini dünyaya nümayiş etdirdi. Həm Ermənistan, həm də ona havadarlıq edən qüvvələr başa düşməlidir ki, Azərbaycan heç bir halda güzəştə getməyəcək. 2020-ci il 10 noyabr tarixli üçtərəfli Bəyanatın müddəaları qeyd-şərtsiz icra olunmalıdır. Əgər kimsə düşünürsə ki, sərhəddəki hərbi təxribatlar bizi strateji hədəflərimizdən yayındıracaq, tamamilə yanılır”, - deyə C.Əhmədli vurğulayıb.
Bölmənin digər xəbərləri
