Politoloq: Prezidentin fikirləri növbəti Qayıdışımızın məhz Qərbi Azərbaycana olacağından xəbər verir
Bakı, 28 dekabr, AZƏRTAC
Prezident İlham Əliyevin doğum günlərini xalqı arasında keçirməsi xoş bir ənənəyə çevrilib. Əlli yaşını Ağcabədidə məcburi köçkünlərlə keçirən dövlətimizin başçısı məhz onların qarşısında söz vermişdi ki, zaman gələcək belə gözəl təqvimləri dədə-baba yurdlarımızda qeyd edəcəyik. Sözü ilə əməli vəhdət təşkil edən bir Liderin xalqına verdiyi vədi hər fürsətdə və hər zaman doğrultduğundan xəbər verən növbəti amil məhz dövlətimizin başçısının 60 illik yubileyini xalqımız üçün ədalət və ləyaqət rəmzi olan Cıdır düzündə bütün dünyanın gözü qarşısında qeyd etməsi oldu. Hələ bunlardan daha əvvəl 2010-cu il iyulun 6-da Qarabağın azərbaycanlı icmasının mənzil-qərargahının açılışında çıxış edən Prezident İlham Əliyev demişdi: “Bu, sizin üçün müvəqqəti bir qərargahdır. Torpaqlarımız işğalçılardan azad olunandan sonra sizin üçün yeni gözəl binalar Qarabağda tikiləcək. Mən buna şübhə etmirəm və tam əminəm ki, Azərbaycan öz ərazi bütövlüyünü bərpa edəcək, bu ədalətsizliyə son qoyulacaq. Ölkəmizin beynəlxalq birlik tərəfindən tanınmış ərazi bütövlüyü bərpa olunacaq”.
Bu fikirləri AZƏRTAC-a açıqlamasında politoloq Şəbnəm Həsənova bildirib.
Politoloq qeyd edib: “Şübhəsiz ki, qazandığımız Zəfər, icra etdiyimiz Böyük Qayıdış proqramı dövlət və xalq olaraq qarşımızda yeni üfüqlər açdı. Həm də vaxtilə məhz Qarabağın məcburi köçkünlər icmasının yerləşdiyi inzibati binanın yerində konkret məqsədli, aydın baxışlı Qərbi Azərbaycan İcmasının yaradılması birinci Böyük Qayıdışımızın Qarabağa, ikincisinin isə mütləq Qərbi Azərbaycana reallaşdırılacağından xəbər verir. Bu baxımdan da Prezident İlham Əliyev Qərbi Azərbaycana qayıtmaq üçün ikinci Böyük qayıdışın konturlarını dəqiqliklə məhz Qərbi Azərbaycan icmasının nümayəndələri ilə görüşdə müəyyən etdi. Necə ki, işğaldan azad olunmuş torpaqlarımızın Baş planı həmin bölgənin sakinlərinin istək və arzularına uyğun olaraq təsdiqlənir, bu faktın özü belə bir Liderin ictimai fikrə verdiyi dəyərin göstəricisidir.
Dövlətimizin başçısının siyasi, tarixi, rəmzi baxımdan önəmli olan çıxışı bütün bu mühüm amillərlə yanaşı, həm də fundamental və proqram xarakterli idi. Bunu sübut edən fakt Qərbi Azərbaycan İcmasının yeni Nizamnaməsinin təsdiq olunması, İcmada Müşahidə, Ağsaqqallar, Ziyalılar, Qadınlar və Qəyyumlar şuraları, İdarə Heyəti, Nəzarət-Təftiş Komissiyası, Gənclər Birliyi, xarici ölkələrdəki nümayəndəliklər kimi strukturların yaradılması, seçkilərin keçirilməsidir.
Şübhəsiz ki, Ermənistan-Azərbaycan potensial münasibətlərinin hazırkı inkişaf ssenarisində səsləndirilən hər fikir, söz dəyərlidir. Lakin zənnimcə, görüş əsnasında Prezidentimizin əsas vurğunu tarixi yaddaş üzərinə etməsi idi. Bu baxımdan nəzəri əsaslarla qeyd etməliyik ki, tarixi yaddaş fərdi və bütövlükdə cəmiyyəti tanımaq qabiliyyətini təmin edən ictimai şüurun əsası, psixi nüvəsi, sosial konsolidasiya üçün ən mühüm katalizatordur. Həm də mütləq qeyd olunmalıdır ki, milli kimliyin formalaşmasında tarixi yaddaşın rolu əvəzsizdir. Mənbələrin sayının təhlili konkret etnik kimliyin formalaşması proseslərini müəyyən etməyə, keçmiş kollektiv yaddaşın bu proseslərə təsirini qeyd etməyə imkan verir. Tarixi maarifləndirmə, dövlətin xarici siyasəti və digər amillər tarixi yaddaşa ciddi təsir göstərir. Tarix, ədəbiyyat və digər ictimai elmlərin tədrisi zamanı tarixi yaddaşa əsaslanan milli kimliyin formalaşması üçün bəzi praktiki tövsiyələr də verir.
“Məhz nəzəri və praktiki amillərin vəhdətini mükəmməl bilən və icra edən dövlətimizin başçısı ən önəmli amil kimi xalqımızın tarixi yaddaşı üzərində dayandı və Zəngilan rayonunun Ağalı kəndinin nümunəsini göstərdi. Yuxarıda qeyd olunan mənbələrin sayının təhlili xronoloji ardıcıllıqla, dəqiqliklə və cəsarətlə verildi. Bu məqamda onu demək yerinə düşər ki, Müzəffər Ali Baş Komandan bu qədər tarixi faktlar, siyasi məsələlərdən əlavə, mənəvi-ideoloji amili bir daha qabartdı və dedi: “Hətta səndən güclü olan qüvvə qarşısında heç vaxt geri addım atmamalısan, hər zaman öz hüququnu qorumalısan, xüsusilə doğma torpağını qorumalısan”. Şübhəsiz ki, Azərbaycanı qalibiyyət zirvəsinə məhz belə bir yüksək mənəvi keyfiyyətlərə xas Lider, güclü sərkərdə çatdıra bilərdi”, - deyə politoloq qeyd edib.
Bölmənin digər xəbərləri
