Polşa Avropa İttifaqının miqrantları yerləşdirmə planına qarşı çıxıb
Varşava, 29 sentyabr, AZƏRTAC
Polşanın Romadakı səfiri Anna Mariya Anders miqrantların Avropa İttifaqı ərazisində paylaşdırılması üzrə yeni razılaşmanı ölkəsinin qəbul etmədiyini bildirib.
AZƏRTAC xəbər verir ki, səfir Polşanın yalnız dil və ənənələr baxımından xalqa yaxın ölkələrdən gələn miqrantları qəbul edəcəyini açıqlayıb: “Avropa Birliyi yenidən bölüşdürülməni istəyir, amma biz fikrimizi dəyişməyəcəyik. Rəsmi Varşava onsuz da çox iş görür. Polşada bir çoxu müharibə bölgələrindən qaçan iki milyon ukraynalı var. Onlar yaxşı inteqrasiya olur, dilimizi, adət-ənənələrimizi və mədəniyyətimizi qismən bölüşürlər. Onlar, həmçinin bizimlə eyni dini bölüşürlər ki, bu da Polşa üçün vacib səbəblərdən biridir”.
Avropa İttifaqı Maltada miqrantlarla bağlı yeni razılaşma qəbul edib. Razılaşmaya əsasən, ölkələr İtaliya və Yunanıstana gələn miqrantları 4 həftədən sonra qəbul etməlidirlər.
Aygün Əliyeva
AZƏRTAC-ın xüsusi müxbiri
Varşava
Bölmənin digər xəbərləri
