Polşada 20 Yanvar şəhidlərinin xatirəsi ehtiramla anılmışdır
Bakı, 23 yanvar (AZƏRTAC). Polşada fəaliyyət göstərən “Birlik” Cəmiyyətinin təşkilatçılığı ilə 1990-cı il 20 Yanvar hadisələrinin 22-ci ildönümünə həsr olunmuş anma tədbiri keçirilmişdir.
AZƏRTAC xəbər verir ki, tədbirdə çıxış edən “Birlik” Cəmiyyətinin sədri Nəbi İbadov 1990-cı ildə keçmiş sovet ordusunun Bakıda dinc sakinlərə qarşı törətdiyi vəhşiliyi terror aktı və insanlığa qarşı cinayət kimi səciyyələndirmişdir. O demişdir ki, 1990-cı il yanvarın 20-də imperiya Azərbaycan xalqını müstəqillik və azadlıq istəyindən döndərmək məqsədilə belə bir qanlı qırğın törətmişdir. İmperiya bununla Azərbaycana ağır zərbə vursa da, xalqın mübarizlik əzmini qıra bilmədi.
Tədbirdə çıxış edən türk iş adamları 20 Yanvar faciəsini sovet dövlətinin törətdiyi cinayət kimi səciyyələndirərək qeyd etmişlər ki, bu qanlı aksiyaya beynəlxalq ictimaiyyət öz münasibətini bildirməlidir.
Mərasimdə iştirak edən Polşa ictimaiyyətinin nümayəndələri Azərbaycan xalqının kədərini bölüşdüklərini, bu üzüntüyə şərik olduqlarını bildirmişlər.
Bölmənin digər xəbərləri
