Pomidor istehsalçıları ilə görüşdə yeni ixrac icazələri haqqında məlumat verilib
Bakı, 29 noyabr, AZƏRTAC
Qida Təhlükəsizliyi Agentliyinin sədri Qoşqar Təhməzli pomidor istehsalçıları ilə görüşüb.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, videokonfrans formatında keçirilən görüşdə Qida Təhlükəsizliyi Agentliyi ilə Rusiya Federasiyasının Baytarlıq və Fitosanitar Nəzarəti üzrə Federal Xidməti (“Rosselxoznadzor”) arasında aparılan danışıqlar və əldə olunan nəticələr barədə sahibkarlara məlumat verilib.
Agentliyin sədri 100-dən artıq sahibkarlıq subyektinin iştirak etdiyi tədbirdə əldə olunan razılaşmalarla əlaqədar məlumatları, pomidor istehsalı ilə məşğul olan sahibkarların üzərinə düşən məsuliyyət və qoyulan tələbləri diqqətə çatdırıb. Qeyd olunub ki, əldə olunmuş razılığa əsasən, Rusiyanın müvafiq qurumunun əməkdaşları tərəfindən təsərrüfatlarda aparılan videomonitorinqlər dayandırılır və bu il dekabrın 1-dən etibarən pomidor istehsalı müəssisələrinə həmin qurum tərəfindən ixrac icazələr birbaşa Qida Təhlükəsizliyi Agentliyinin zəmanət məktubu əsasında veriləcək.
Tədbirdə pomidor bitkisinə qoyulan ixrac tələbləri ilə bağlı fikir mübadiləsi aparılıb, sahibkarları maraqlandıran suallar cavablandırılıb, həmçinin təsərrüfatlarda bir sıra zəruri tədbirlərin həyata keçirilməsinə dair tapşırıqlar verilib.
Bölmənin digər xəbərləri
