Premyer Liqa: “Araz-Naxçıvan” autsayderlə oyunda xal itirib
Bakı, 27 aprel, AZƏRTAC
Futbol üzrə Misli Premyer Liqasında XXXII turun daha bir oyunu keçirilib.
AZƏRTAC xəbər verir ki, avrokuboklara vəsiqə uğrunda mübarizə aparan "Araz-Naxçıvan" "Səbail"in qonağı olub. "ASCO Arena"da oynanılan qarşılaşmada qalib müəyyənləşməyib - 1:1.
Matçda hesabı 30-cu dəqiqədə Naxçıvan təmsilçisinin heyətində Ülvi İsgəndərov açıb. "Dənizçilər"in qolunu isə 76-cı dəqiqədə Marko Nikoliç vurub.
Bu nəticədən sonra "Araz-Naxçıvan" 54 xalla 3-cü, "Səbail" isə 21 xalla sonuncu - 10-cu pillədə qərarlaşıb.
Günün son oyunu saat 20:00-da "Sabah" və "Qarabağ" komandaları arasında olacaq.
Qeyd edək ki, XXXII turun əvvəlki matçlarında "Turan Tovuz" öz meydanında "Şamaxı" ilə 1:1 hesablı heç-heçə edib, "Zirə" isə səfərdə "Kəpəz"ə qalib gəlib – 1:0. Tura aprelin 28-də keçiriləcək "Sumqayıt" - "Neftçi" görüşü ilə yekun vurulacaq.
Bölmənin digər xəbərləri
