Prezident İlham Əliyev Qərbi azərbaycanlılarla görüşdə subliminal mesajlar verdi
Bakı, 29 dekabr, AZƏRTAC
Prezident İlham Əliyevin məhz öz doğum günündə Qərbi Azərbaycan İcmasının binasının açılışında iştirak etməsi çox mühüm mesaj yükü daşıyırdı. Hər şeydən əvvəl məsələyə daha geniş auditoriyanın diqqətinin cəlb edilməsi baxımından seçilən tarix çox əhəmiyyətli idi. Çünki ölkə Prezidentinin məhz doğum günü hansı addımlar atması, hansı fəaliyyətlə məşğul olması istər yerli, istərsə də dünya mediası tərəfindən diqqətlə təqib edilir.
Azərbaycan Prezidenti bu görüşü ilə növbəti mühüm milli prioritetin nədən ibarət olduğu haqqında çox təsirli subliminal mesaj vermiş oldu.
Bu fikirləri AZƏRTAC-a açıqlamasında Milli Məclisin deputatı Elşad Mirbəşiroğlu deyib.
Onun sözlərinə görə, dövlətimizin başçısı hər şeydən əvvəl məsələ ilə bağlı bilənlərdə təsəvvürləri möhkəmləndirdi, bilməyənlərdə də təsəvvürlər formalaşdırdı ki, hazırkı Ermənistan Azərbaycanın tarixi torpaqlarında yaradılıb. Ermənilərin işğalçı, təcavüzkar və separatçı istəklərini dəstəkləyənlər bu amili nəzərə almalıdırlar. Bu, Ermənistanın özü üçün də ciddi mesaj idi. Yəni, artıq Azərbaycanın tarixi torpaqlarında bir dəfə erməni dövləti yaradılıb. Azərbaycanlılar öz tarixi torpaqlarından zorla çıxarılıb və buna görə cavab vermək zamanı gəlib. Ölkə Prezidenti açılışını etdiyi binada artıq ikinci dəfə olduğunu xatırlatdı. Birinci dəfə Qarabağın məcburi köçkünlər icması üçün binanın açılışında iştirak edən ölkə Prezidenti bu yerin onlar üçün müvəqqəti olduğunu demişdi.
Artıq Qarabağ əhalisinin öz doğma torpaqlarına qayıtmağa başladığını diqqətə çatdıran E.Mirbəşiroğlu əlavə edib: “Zəngilan rayonunun Ağalı kəndində “Ağıllı kənd”, “Ağıllı şəhər” konsepsiyası üzrə ən müasir tələblərə cavab verən yaşayış məskəni salınıb. Ata-babaları Zəngilandan olan gənclər və uşaqlar oraları heç vaxt görməyiblər. Lakin vətənə, torpağa olan sevgiləri, bağlılıq onları doğma torpaqlara qaytarıb. Dekabrın 24-də Prezident İlham Əliyev Qərbi Azərbaycandan olan soydaşlarımızın, onların övladlarının, nəvələrinin bizim tarixi torpaqlarımız olan Qərbi Azərbaycana qayıdacağını da dedi. Bu isə o anlama gəlir ki, bundan sonra tarixi ədalətin bərpa edilməsi, Qərbi Azərbaycandan olan soydaşlarımızın doğma, tarixi torpaqlarımıza qaytarılması üçün mühüm bir missiyanın həyata keçirilməsinə başlanılacaq. Qərbi Azərbaycan İcması bu istiqamətdə nəticəyə yönəlik fəaliyyəti həyata keçirəcək”.
Deputat bildirib ki, Prezident İlham Əliyev soydaşlarımızın öz tarixi torpaqlarına qaytarılmasının beynəlxalq hüquq çərçivəsində həyata keçiriləcəyini vurğuladı. Bu məqsədlə beynəlxalq hüquq sahəsi üzrə mütəxəssislərin cəlb olunacağı da nəzərə çatdırılacaq. Prezident İlham Əliyev bununla həm də regionda daha etibarlı təhlükəsizlik və sülh sisteminin qurulması istiqamətində məhz Azərbaycanın töhfə vermək əzmini nümayiş etdirdi. Belə ki, Azərbaycanın iradəsi və təşəbbüsləri ilə regionda elə bir təhlükəsizlik və sülh şəraiti təmin olunacaq ki, Qərbi Azərbaycandan olan soydaşlarımız tam təhlükəsizlik şəraitində öz tarixi torpaqlarına qayıdıb yaşaya biləcəklər.
“Qarabağda olduğu kimi, Qərbi Azərbaycanda da ermənilər Azərbaycan xalqına məxsus tarixi və mədəni irsi tam məhv ediblər. Buna baxmayaraq, tarixi sənədlər, xəritələr və digər dəlil-sübutlar dəqiq təsdiq edir ki, Qərbi Azərbaycan bizim tarixi torpaqlarımızdır. Hazırkı Ermənistanın yerləşdiyi ərazilərdə tarix boyu azərbaycanlılar yaşayıblar. Həmin ərazilərlə bağlı Azərbaycan xalqının tarixi yaddaşı mövcuddur və bu yaddaş soydaşlarımızı öz doğma tarixi torpaqlarına qaytaracaq. Zəngilan rayonunun Ağalı kəndi buna bariz nümunədir. O yerləri heç vaxt görməyən insanlar oraya qayıtdılar. Eyni prosesləri Qərbi Azərbaycan istiqamətində də müşahidə edəcəyik. Qarabağın, Şərqi Zəngəzurun işğaldan azad edilməsi bizim digər milli ideyalarımızın həyata keçirilməsi üçün möhkəm zəmin yaratdı. Azərbaycanın güclü dövlət olduğu və onu yolundan döndərməyin mümkünsüzlüyü faktı qəbul olundu. Beləliklə, dəfələrlə deportasiyalara məruz qalmış Qərbi Azərbaycandan olan soydaşlarımızın hüquqları bərpa edilməlidir və onlar öz tarixi torpaqlarına qayıtmalıdırlar. Ölkə Prezidenti bunu sülh yolu ilə etmək istədiyimizi də vurğuladı”, - deyən Elşad Mirbəşiroğlu fikirlərini tamamlayıb.
Bölmənin digər xəbərləri
