Professor Binəli Musayevin 80 illik yubileyinə həsr olunmuş elmi sessiya keçirilib
Bakı, 12 fevral, AZƏRTAC
Elm və Təhsil Nazirliyinin Riyaziyyat və Mexanika İnstitutunda görkəmli alim, professor Binəli Musayevin 80 illik yubileyinə həsr olunmuş elmi sessiya keçirilib.
Bu barədə AZƏRTAC-a institutdan məlumat verilib.
Tədbirdə Riyaziyyat və Mexanika İnstitutunun baş direktoru AMEA-nın müxbir üzvü professor Misir Mərdanov, professor Rəşid Əliyev alimin səmərəli elmi fəaliyyətindən, riyaziyyat elminin inkişafına verdiyi dəyərli töhfələrindən danışıblar.
Qeyd edilib ki, Binəli Musayevin elmi əsərləri əsasən birölçülü və çoxölçülü sinqulyar inteqralların təqribi hesablanmasına və müxtəlif nüvəli xətti və qeyri-xətti sinqulyar inteqral tənliklərin konstruktiv həllərinin qurulmasına həsr olunub.
Vurğulanıb ki, professor Binəli Musayev nüfuzlu riyaziyyatçı olmaqla yanaşı, həm də böyük müəllim idi. O, Bakı Dövlət Universiteti, Azərbaycan Dövlət Neft və Sənaye Universiteti və Türkiyə Cümhuriyyəti Dumlupınar Universitetində uzun illər riyazi analiz, funksional analiz fənləri və bir çox ixtisas kursları üzrə çox yüksək səviyyədə mühazirələr oxuyub. Onun mühazirələri bir nəsil Azərbaycan və türk riyaziyyatçılarının formalaşmasında mühüm rol oynayıb. O, 100-dən artıq elmi əsərin müəllifi olub.
Digər çıxış edənlər Binəli Musayevlə bağlı xatirələrini bölüşüblər.
Sonda alimin oğlu İsa Musayev ailəsi adından tədbirin təşkilatçılarına və iştirakçılarına minnətdarlığını bildirib.
Bölmənin digər xəbərləri
