Pxenyan: “Fukusima-1” AES-də toplanmış çirkab suyun okeana axıdılması fəlakət olacaq
Pekin, 15 aprel, AZƏRTAC
Koreya Xalq Demokratik Respublikası (KXDR) Yaponiyanın qəzalı vəziyyətdə olan “Fukusima-1” atom elektrik stansiyasının (AES) reaktorlarını soyutmaq üçün istifadə edilmiş suyun okeana axıdılmasının bəşəriyyət üçün fəlakət olacağını hesab edir.
AZƏRTAC xəbər verir ki, Koreya Mərkəzi Xəbər Agentliyi (KCNA) Pxenyanın məsələyə münasibətinə dair material yayaraq, Tokiodan bu qərarın dərhal ləğvini tələb edib.
Pxenyan hesab edir ki, okeana buraxılması nəzərdə tutulan çirkab su qısa müddətdə Sakit okeanın əksər hissəsinə yayılaraq, bir çox təhlükələrə səbəb ola bilər. Bu, insanlıq və ətraf mühitin sağlamlığı və təhlükəsizliyi üçün bağışlanmaz cinayətkar qərardır.
Qeyd edək ki, aprelin 13-də Yaponiya Nazirlər Kabinetinin iclasında “Fukusima-1” AES-də reaktorları soyutmaq üçün istifadə edilmiş 1,25 milyon ton suyun okeana axıdılması barədə qərar qəbul edilib. Xüsusi çənlərdə toplanmış suyun okeana axıdılmasına 2023-cü ildə başlanılacaq. Yaponiya hökuməti qarşıdakı iki il ərzində AES-də toplanmış çirkab suyun tərkibindəki radioaktiv maddələrdən beynəlxalq standartlara uyğun olaraq təmizlənərək dünya okeanına ziyan vurmayacağını açıqlasa da, bəzi ekspertlər texniki cəhətdən tritiumun suyun tərkibindən təmizlənməsinin mümkün olmadığını qeyd edirlər.
Region ölkələrindən Çin və Cənubi Koreya daha əvvəl bu qərara etirazlarını bildiriblər.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
