“Qalib Azərbaycan: beş ildə Zəfərdən Zirvəyə” adlı tədbir keçirilib
Bakı, 8 noyabr, AZƏRTAC
Qarabağ Dirçəliş Fondunun təşkilatçılığı ilə Zəfər Gününün beşinci ildönümünə həsr olunmuş “Qalib Azərbaycan: beş ildə Zəfərdən Zirvəyə” adlı tədbir keçirilib.
Fonddan AZƏRTAC-a bildirilib ki, “#KarabakhTalks” müzakirələr platforması çərçivəsində keçirilən tədbir Dövlət Himninin səsləndirilməsi və şəhidlərin əziz xatirəsinin yad edilməsi ilə başlayıb.
Sonra işğaldan azad edilmiş ərazilərdə həyata keçirilən bərpa və quruculuq işlərinə həsr olunmuş “Faciədən Zəfərə” adlı videoçarx nümayiş edilib.
Qarabağ Dirçəliş Fondunun İdarə Heyətinin sədri Rəhman Hacıyev çıxışında bildirib ki, hər il qürurla qeyd etdiyimiz bu tarixi gün xalqımızın milli birliyinin, əzminin və qətiyyətinin rəmzidir. Prezident, Müzəffər Ali Baş Komandan İlham Əliyevin rəhbərliyi ilə rəşadətli Ordumuzun əldə etdiyi bu Qələbə təkcə torpaqlarımızın azad olunması deyil, həm də milli ruhun, ədalətin və suverenliyin təntənəsidir. İşğaldan zad edilən ərazilər ölkəmizin ən genişmiqyaslı bərpa və yenidənqurma proseslərinin mərkəzinə çevrilib.
Azərbaycan Dövlət İqtisad Universitetinin rektoru, Qarabağ Dirçəliş Fondunun Müşahidə Şurasının üzvü Ədalət Muradov çıxış edərək Qarabağın azad olunmasının son 200 ildə Türk dünyasının əldə etdiyi ən böyük nailiyyətlərdən biri olduğunu bildirib. Vurğulayıb ki, bu gün Azərbaycan Cənubi Qafqazın gələcəyini müəyyən edən lider dövlətdir. Regionda həyata keçirilən iri layihələr məhz Azərbaycanın təşəbbüsü və iştirakı ilə reallaşdırılır.
Qarabağ Dirçəliş Fondunun Fandreyzinq və kommunikasiya şöbəsinin müdiri Pərvin Bağırovanın moderatorluğu ilə keçən tədbirdə Milli Məclisin deputatı Ceyhun Məmmədov, Təhsilin İnkişafı Fondunun İdarə Heyətinin sədri vəzifəsini müvəqqəti icra edən İlqar Bayramlı, Vəkillər Kollegiyasının sədr müavini Şahmar Məmmədov, “Azərbaycanda Minadan Zərərçəkənlərin Assosiasiyası” İctimai Birliyinin sədri Rey Kərimoğlu, Beynəlxalq Avrasiya Mətbuat Fondunun prezidenti Umud Mirzəyev, Milli Qəhrəman, şəhid general-mayor Polad Həşimovun həyat yoldaşı Ofelya Salmanova, şəhid polkovnik-leytenant Raquf Orucovun həyat yoldaşı, “Zəfər” Şəhid Ailələrinə Dəstək İctimai Birliyinin rəhbəri Sevinc Orucova, müharibə iştirakçısı Alik Yusifov və başqaları Zəfər Gününün Azərbaycan xalqı üçün daşıdığı mənəvi və siyasi əhəmiyyəti xüsusi vurğulayaraq, bu Zəfərin Azərbaycan tarixində yeni bir mərhələnin başlanğıcı olduğunu söyləyiblər.
Qeyd edək ki, bu əlamətdar tarix ərəfəsində Azərbaycan Dövlət İqtisad Universiteti (UNEC) işğaldan azad edilmiş ərazilərin bərpasına dəstək məqsədilə Qarabağ Dirçəliş Fonduna 200 min manat məbləğində ianə edib. Fondun İdarə Heyətinin sədri Rəhman Hacıyev göstərilən bu dəyərli dəstəyə görə universitetin rektoru Ədalət Muradova “İanə sertifikatı” təqdim edib və bu töhfəni yüksək dəyərləndirib.
Daha sonra tədbir iştirakçıları “Qarabağın Dirçəlişi: Azərbaycan intibahının hekayəsi” adlı fotosərgi ilə tanış olublar. Britaniyalı yazıçı Qrem Vilsonun eyniadlı kitabında yer alan təsirli fotolar əsasında təşkil edilmiş sərginin məqsədi işğaldan azad olunmuş ərazilərdə aparılan irimiqyaslı bərpa-quruculuq işləri ilə bağlı həm ölkə ictimaiyyəti məlumatlandırmaqdır.
Bölmənin digər xəbərləri
