Qanlı Yanvar faciəsi qurbanlarının xatirəsi İordaniyada da anılmışdır
Bakı, 19 yanvar (AZƏRTAC). Azərbaycanın İordaniyadakı səfirliyində 20 Yanvar faciəsinin 22-ci ildönümü ilə bağlı mətbuat konfransı keçirilmişdir.
Səfirlikdən AZƏRTAC-a bildirmişlər ki, İordaniyanın 20-dək kütləvi informasiya vasitələri təmsilçilərinin iştirak etdiyi tədbirdə faciə qurbanlarının xatirəsi bir dəqiqəlik sükutla yad edilmişdir.
Səfir Elman Araslı Qanlı Yanvar faciəsinin tarixi, onun dövlət müstəqilliyimizin bərpasında oynadığı rolu haqqında ətraflı məlumat vermişdir. Jurnalistlərin suallarını cavablandıran diplomat xalqımıza qarşı törədilmiş bu cinayətin beynəlxalq ictimaiyyət tərəfindən qətiyyətlə pislənməsinin zəruriliyini vurğulamışdır. O, bu işdə media nümayəndələrinin də yaxından iştirakına böyük ehtiyac olduğunu bildirmişdir.
Azərbaycanlı diplomat 20 Yanvar faciəsinin 22-ci ildönümü ilə əlaqədar İordaniya Televiziyasına müsahibə vermişdir. Həmçinin səfirlik tərəfindən müvafiq bəyanat hazırlanaraq İordaniyanın Xarici İşlər Nazirliyinə, bir sıra digər rəsmi qurumlara, bu ölkədə akkreditə olunmuş diplomatik nümayəndəliklərə və yerli KİV-lərə göndərilmişdir.
Mətbuat konfransı İordaniyanın "Rəy", "Düstur", "Jordan Times", "Diyar", "Əl-Ğad", "Əl-Diyar" kimi bir sıra nüfuzlu qəzetlərində geniş işıqlandırılmışdır.
Bölmənin digər xəbərləri
