Qanunsuz ov edən Bərdə sakinlərinin hər biri 2 min manat məbləğində cərimə edilib
“Ovçuluq haqqında” Azərbaycan Respublikası Qanununun tələblərinə əməl olunması vəziyyətinin araşdırılması məqsədi ilə Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən noyabrın 5-6-da növbəti reydlər keçirilib.
Nazirliyin mətbuat xidmətindən AZƏRTAC-a verilən məlumata görə, reyd zamanı Bərdə rayonunun Nazırlı kəndi ərazisində qanunsuz ov edən kənd sakinləri Taleh Əbilov və Mürşid Əbilov saxlanılaraq onlardan 2 ov tüfəngi, 2 ədəd patron və 1 dovşan götürülüb. Qanun pozucuları barəsində akt və protokol tərtib olunaraq hər biri 2000 manat məbləğində cərimə edilib.
Xocavənd rayonu ərazisində keçirilmiş reyd zamanı ovla məşğul olan rayon sakini Qəşəm Fərzəliyev saxlanılıb, ondan 1 ov tüfəngi, 2 patron götürülərək akt və protokol tərtib edilib və 1000 manat məbləğində cərimə olunub.
Cəlilabad rayonu Zəvvar ovçuluq təsərrüfatında keçirilmiş reyd zamanı qanunsuz ov edən Biləsuvar rayon Qoçubərə kənd sakini Sahib Əbişov saxlanılıb. Ondan 1 ov tüfəngi aktlaşdırılaraq götürülüb və 1000 manat məbləğində cərimə edilib.
Zəvvar ovçuluq təsərrüfatında keçirilmiş növbəti reyd zamanı isə 2 nəfər naməlum şəxs saxlanılıb. Onlardan 2 ov tüfəngi götürülərək qanunamüvafiq qaydada akt tərtib olunub. Sənəd təqdim etməyən qanun pozucularının şəxsiyyətlərini müəyyənləşdirmək üçün Nazirlik tərəfindən aidiyyəti rayon polis şöbəsinə müraciət edilib.
Qızılağac Dövlət Təbiət Qoruğunun ərazisində ov etmək istəyən naməlum şəxs ərazidə reyd keçirən Nazirliyin əməkdaşlarını görən zaman ov tüfəngini ataraq ərazidən uzaqlaşıb. Nazirliyin əməkdaşları onu təqib etsələr də, qanun pozucusunu saxlamaq mümkün olmayıb. Ov tüfəngi götürülərək fakt üzrə akt tərtib edilib, təqsirkarın şəxsiyyətinin müəyyənləşdirilməsi məqsədilə Masallı Rayon Polis Şöbəsinə müraciət olunub.
Reydlər davam etdirilir.
Bölmənin digər xəbərləri
