Qanunsuz ov edənlər cərimələniblər
Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən “Ovçuluq haqqında” Azərbaycan Respublikası Qanununun tələblərinə əməl olunması, eləcə də ovlanmış çöl quşlarının və heyvanların qeyri-qanuni satışının qarşısının alınması məqsədi ilə ölkə ərazisində növbəti reydlər keçirilib.
Nazirliyin mətbuat xidmətindən AZƏRTAC-a verilən məlumata görə, noyabrın 3-də keçirilmiş reyd zamanı Qusar rayonunun Hil kəndi ərazisində bu kəndin sakini Marks Dövlətov qanunsuz ov edərkən saxlanılıb. Ondan 1 ədəd tüfəng götürülərək barəsində qanunamüvafiq qaydada akt və protokol tərtib edilib. Qanun pozucusu 1000 manat məbləğində cərimə olunub.
Noyabrın 4-də isə Bərdə və Qusar rayonları ərazisində qanunsuz ov edən naməlum şəxslər saxlanılıb, onlardan 2 tüfəng və 18 ədəd patron götürülüb. Eyni zamanda, keçirilmiş reydlər zamanı ov quşlarının satışının təşkil edildiyi də aşkarlanıb. Belə ki, Lənkəran rayonu Şirinsu kəndi ərazisində 1, Qumbaşı kəndi ərazisində 4, Masallı rayonu avtomobil yolunun kənarında 3 nəfər saxlanılaraq onlardan ümumilikdə 24 ədəd quş götürülüb və məhv edilib.
Qanun pozucuları barəsində müvafiq aktlar tərtib olunub, şəxsiyyətlərinin müəyyənləşdirilməsi və barələrində qanunvericiliyə uyğun tədbir görülməsi üçün tərtib edilmiş sənədlər aidiyyəti rayon polis şöbələrinə göndərilib.
Reydlər davam etdirilir.
Bölmənin digər xəbərləri
