“Qara Yanvar” hadisələrinin 22-ci ildönümü Nyu-Yorkda da anılmışdır
Vaşinqton, 21 yanvar (AZƏRTAC). Azərbaycanın BMT yanında daimi nümayəndəliyindən AZƏRTAC-a verilən məlumata görə, “Qanlı Yanvar” faciəsinin 22-ci ildönümü dünya azərbaycanlıları tərəfindən anılarkən Nyu-Yorkda fəaliyyət göstərən bir sıra icma təşkilatlarımızın fəalları ölkəmizin daimi nümayəndəliyinə gələrək 20 Yanvar faciəsi ilə bağlı başsağlığı vermiş və bu hüznü Azərbaycan xalqı ilə bölüşdüklərini vurğulamışlar.
Diplomatik nümayəndəliyimiz BMT-yə üzv dövlətlərin nümayəndəlikləri arasında “Qara Yanvar” hadisələrini işıqlandıran press-reliz yaymışdır. Press-relizdə qeyd edilmişdir ki, 22 il əvvəl Azərbaycan xalqının qanuni narahatçılığına və tələblərinə ədalətli cavab vermək əvəzinə, sovet imperiyasının rəhbərliyi dinc nümayişçiləri güc yolu ilə dağıtmağa qərar vermişdir. Öz xalqına qarşı hərbi zorakılıqdan istifadə etməklə sovet rəhbərliyi siyasi rejimin əsl simasını nümayiş etdirmişdir. Mülki əhaliyə qarşı törədilmiş bu misilsiz vəhşilik sovet ordusunun tarixinə qara hərflərlə yazılmışdır.
Yanvarın 20-də Azərbaycan diasporu tərəfindən Nyu-Yorkun Əyyub Sultan məscidində “Qara Yanvar” şəhidlərinin əziz xatirəsi yad edilərək, onların ruhuna dualar oxunmuş, ehsan verilmişdir.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
