“Qardaşlaşmış məktəblər”in “Şuşa İli”nə həsr olunmuş onlayn görüşü keçirilib
Şəki, 25 noyabr, Mustafa Dadaşov, AZƏRTAC
“Qardaşlaşmış məktəblər” təşəbbüsünə qoşulan Balakən rayonunun şəhər 2 nömrəli tam orta məktəbinin təşkilatçılığı ilə “Qardaşlaşmış məktəblər”in “Şuşa İli”nə həsr olunmuş onlayn görüşü keçirilib.
Bu barədə AZƏRTAC-ın bölgə müxbirinə Şəki-Zaqatala Regional Təhsil İdarəsinin məsul əməkdaşı Mahal Məmmədov məlumat verib.
Bildirilib ki, tədbirdə Türkiyənin 5 ayrı bölgəsindən olan (Əziz Sancar Bilim və Sənət Mərkəzi - Ankara, Çiğdemli Ortaokulu - Zonguldak, Validə Sultan MTAL Mersin - Anamur, İstanbuloğlu Sosial Elmlər Liseyi Karesi - Balıkesir, Tevfik Sırrı Gür Anadolu Liseyi - Mersin) məktəblər və Balakən rayonunun digər “qardaşlaşmış məktəb”i - Qaravəli kənd tam orta məktəbin müəllim və şagirdləri iştirak ediblər.
Onlayn görüşdə "Şuşa İli" ilə əlaqədar şəhər 2 nömrəli tam orta məktəbin təşkil etdiyi sərgi “qardaşlaşmış məktəblər”in müəllim və şagirdlərinə nümayiş olunub. Görüşdə, həmçinin Vətən müharibəsinin gedişi, əldə edilən tarixi Qələbə və Şuşa döyüşləri barədə çıxışlar dinlənilib.
Tədbirdə müəllim və şagirdlər şeir söyləyib, mahnılar ifa ediblər.
Bölmənin digər xəbərləri
