Qazaxıstanda Senat və Məclis sonuncu birgə iclasını keçirəcək
Astana, 23 iyun, AZƏRTAC
Qazaxıstanda Senat və Məclisin deputatları iyunun 26-da birgə iclasa toplaşacaqlar.
AZƏRTAC Qazaxıstan mediasına istinadla xəbər verir ki, parlamentin palatalarının birgə iclasının çağırılması barədə müvafiq sərəncamı Məclisin sədri Yerlan Koşanov imzalayıb.
İclas yeni Konstitusiyanın qüvvəyə minməsinə bir neçə gün qalmış keçiriləcək. Həmin Konstitusiyaya əsasən, Senat və Məclis ləğv ediləcək, onların yerinə isə birpalatalı parlament – Qurultay fəaliyyətə başlayacaq.
Qurultay deputatlarının seçkilərinin avqust ayında keçirilməsi planlaşdırılır. Səsvermənin dəqiq tarixi hələ açıqlanmayıb. Yeni parlamentdə proporsional seçki sistemi əsasında partiya siyahıları üzrə seçiləcək ümumilikdə 145 deputat təmsil olunacaq.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
