Qazi: Qolumu itirsəm də, Qarabağ torpağını qazanmışam VİDEO
Naxçıvan, 23 oktyabr, AZƏRTAC
Vətən müharibəsində şücaət göstərərək adını müasir hərb tariximizə qızıl hərflərlə yazan oğullardan biri də Şərur rayon sakini Ceyhun Davudovdur.
AZƏRTAC-ın bölgə müxbiri qəhrəman qazimizlə həmsöhbət olub, döyüş yolu ilə bağlı fikirlərini öyrənib.
Ağdam rayonundakı "N" hərbi hissənin kəşfiyyat taqım komandiri olaraq hərbi xidmətə başlayan Ceyhun deyir ki, hərbçi peşəsinə özünə həyat amalı seçən bir şəxs kimi hər zaman Ali Baş Komandanın döyüş əmrini gözləyirdi: "Nəhayət, bu döyüş əmri 2020-ci il sentyabrın 27-də verildi. Mən öz heyətimlə birlikdə Tərtər rayonundan döyüşlərə qatıldım. Həmin döyüşlərdə ilk tapşırıq Tərtər rayonu istiqamətində ön xəttin yarılması, sonra isə Milli Qəhrəman Mübariz İbrahimovun şəhid olduğu döyüş mövqeyinin düşməndən geri qaytarılması idi. Sonuncu əmr isə Suqovuşanın düşməndən təmizlənməsi oldu. Bu döyüşlərdə mən sağ qolumu itirdim. Ancaq heyfsilənmirəm. Çünki qolumu itirsəm də, əvəzində ürəyimdəki arzuları - Qarabağ torpağını qazanmışam".
Ceyhun Davudov bildirir ki, döyüşlər zamanı yaşanan, hafizəsindən heç zaman silinməyəcək xatirələr kifayət qədərdir: "Şəhidlərimiz olsa da, qardaşlarımız yaralansa da hər bir əsgər, zabit heç vaxt döyüşdə geri addım atmağı düşünmürdü. Hər kəs torpaqlarımızın azad olunması üçün irəli getməyə can atırdı. Fəxr edirəm ki, Azərbaycanın ərazi bütövlüyü uğrunda gedən döyüşlərin iştirakçısı olmuşam. Həmin döyüşlərdən sonra Vətənimiz bütövləşdi. Bu gün alnımız açıqdır. Çünki tökülən qanlar yerdə qalmadı və bütöv, qalib, azad Azərbaycanda yaşayırıq".
"Müharibə başlayanda düşünmürdük ki, döyüşdən sağ qayıdarıq və ya qazi olarıq. Heç vaxt bu düşüncədə deyildik. Bizim bir amalımız var idi ki, torpaqlarımızı düşməndən geri qaytaraq. 30 il idi ki, torpaqlarımız düşmən tapdağı altında qalmışdı. Bu bizlərə hərbi təhsil aldığımız dövrlərdə də ağır gəlirdi. Çünki düşünürdük ki, bizim güclü ordumuz, ən müasir texnikamız, silah-sursatımız var. Belə halda niyə də torpaqlarımız işğalda qalmalıdır", - deyir Ceyhun.
İgid Vətən oğlu vurğulayır ki, ordumuzun bölmələri döyüşlər zamanı düşmənin öz silahlarını özlərinə qarşı istifadə ediblər. Müharibə başlayandan qarşı tərəf mütəmadi şəkildə öz döyüş texnikalarını, silah-sursatlarını mövqelərdə qoyub qaçırdılar. Bakıdakı Hərbi Qənimətlər Parkı bunun əyani sübutudur.
"Müharibədən sonra qazi kimi ordu sıralarından ayrılsaq da, hərbi formaya olan sevgimiz heç vaxt bitməyəcək. Bu gün dövlətimiz qarşısında yenə xidmətimizi davam etdiririk. Şükürlər olsun ki, bizlərə göstərilən diqqət və qayğı yüksək səviyyədədir. Bizim üçün gözəl iş imkanları yaradılıb, hər cür imtiyazımız təmin olunub. Bunun üçün mən Ali Baş Komandanımıza öz minnətdarlığımı bildirirəm", - deyə qəhrəman qazimiz əlavə edir.
Prezident İlham Əliyevin imzaladığı müvafiq sərəncamlarla Ceyhun Davudov “Ağdamın azad olunmasına görə”, “Suqovuşanın azad olunmasına görə”, “Cəsur döyüşçü” və “Vətən müharibəsi iştirakçısı” medalları ilə təltif olunub. O, qürurla danışır, çünki uğrunda döyüşdüyü Vətən azaddır və qalib, müzəffər ordudan ehtiyata buraxılıb.
Bölmənin digər xəbərləri
