Qəbələ rayonunun ictimaiyyəti şəhidlərin əziz xatirəsini yad etmişdir
Qəbələ, 20 yanvar (AZƏRTAC). Yanvarın 20-də Qəbələ rayon ictimaiyyətinin nümayəndələri Şəhidlər xiyabanını ziyarət etmiş, Vətən yolunda canından keçmiş oğulların məzarı üzərinə gül dəstələri düzmüş, abidə kompleksi önünə əklil qoymuşlar.
AZƏRTAC xəbər verir ki, ümumxalq hüzn günündə rayonda dövlət bayraqları endirilmiş, gün ərzində Qəbələ şəhərinin mərkəzində matəm musiqisi səsləndirilmişdir. Saat 12.00-da şəhidlərin əziz xatirəsi bir dəqiqəlik sükutla yad edilmiş, avtomobillər vasitəsilə səs siqnalları verilmişdir.
Həmçinin rayonun təhsil və mədəniyyət müəssisələrində 20 Yanvar şəhidlərinin xatirəsinə həsr olunmuş görüşlər, ədəbi-bədii tədbirlər, idman yarışları, inşa yazı müsabiqələri keçirilmişdir. Orta məktəblərdə qanlı şənbə gecəsinin qurbanlarına həsr edilmiş xüsusi dərslər keçilmiş, məscidlərdə dini mərasimlər icra olunmuşdur.
Bölmənin digər xəbərləri
