REGİONLAR
Qəbələdə 19 min 450 hektar taxıl sahəsində biçin aparılır
Qəbələ, 17 iyun, Mustafa Dadaşov, AZƏRTAC
Qəbələ rayonunun təsərrüfatlarında bir neçə gündür arpa biçininə başlanılıb. Rayonun Dizaxlı, Kürd, Qəmərvan, Böyük Əmili kəndlərinin və Nic qəsəbəsinin ərazilərindəki təsərrüfatlarda ilk günlər 800 hektaradək sahənin arpası biçilib, 2080 ton məhsul tədarük olunub. Hələlik hər hektardan orta məhsuldarlıq 26 sentner təşkil edir.
Bu barədə AZƏRTAC-ın bölgə müxbirinə Qəbələ Dövlət Aqrar İnkişaf Mərkəzinin bitkiçilik sektorunun müdiri Elimdar Şərifov məlumat verib.
Sektor müdirinin sözlərinə görə, builki mövsümdə rayonda 19 min 450 hektar taxıl sahəsinin məhsulunun biçilməsi nəzərdə tutulur. Taxıl əkinlərinin 14 min 558 hektarını buğda, 4 min 892 hektarını isə arpa sahələri təşkil edir. Taxıl sahələrində bol məhsul yetişdiyindən növbəti günlərdə hər hektardan orta məhsuldarlığın daha da artacağı gözlənilir.
Taxıl biçininin mütəşəkkil şəkildə keçirilməsini təmin etmək üçün Qəbələ Dövlət Aqrar İnkişaf Mərkəzində xüsusi qərargah da yaradılıb, tədbirlər planı təsdiq olunub. Biçin kampaniyasına, ümumilikdə, 27 kombayn, həmçinin lazımi qədər şum traktoru, küləşpresləyən aqreqat, yük maşını, qoşqu və digər texnika cəlb edilib. Hazırda sahələrdə 14 kombayn işləyir. Zərurət yaranarsa, biçinə əlavə kombaynlar da cəlb olunacaq.