QƏBƏLƏDƏ GƏNCLƏR GÜNÜ QEYD EDİLMİŞDİR
Qəbələ Rayon Gənclər, İdman və Turizm İdarəsindən AZƏRTAC-a bildirmişlər ki, 2 fevral - Gənclər günü münasibətilə keçirilmiş tədbirin iştirakçıları əvvəlcə ümummilli liderimiz Heydər Əliyevin xatirəsini yad etmiş, büstünün önünə əklil qoymuşlar.
Mədəniyyət evində keçirilən tədbirdə çıxış edənlər bu əlamətdar günün dahi şəxsiyyət Heydər Əliyevin Sərəncamı ilə qeyd olunduğunu vurğulamış, bunu ulu öndərimizin gənclərimizə diqqət və qayğısının təzahürü kimi qiymətləndirmişlər. Qeyd olunmuşdur ki, bugünkü gənclik respublikamızın siyasi, iqtisadi və mədəni həyatında fəal iştirak edir və Prezident İlham Əliyevin müstəqil Azərbaycanın dinamik inkişafına yönəlmiş fəaliyyətini dəstəkləyirlər.
Ədəbi-musiqili tədbirdə əmək, təhsil və idmanda fərqlənənlərə fəxri fərmanlar və mükafatlar verilmiş, Yeni Azərbaycan Partiyası sıralarına qəbul olunmuş gənclərə üzvlük vəsiqələri təqdim edilmişdir.
Gənclər günü münasibətilə rayonun təhsil müəssisələrində də yığıncaqlar keçirilmiş, gənclərin əl işlərindən ibarət sərgi və idman yarışları təşkil olunmuşdur.
