Qətərdə yaşayan soydaşlarımızla görüş keçirilib
Bakı, 13 fevral, AZƏRTAC
Qətərdə səfərdə olan Diasporla İş üzrə Dövlət Komitəsinin nümayəndə heyəti Doha şəhərində bu ölkədə yaşayan azərbaycanlılarla görüşüb.
Dövlət Komitəsindən AZƏRTAC-a verilən məlumata görə, görüşdən əvvəl nümayəndə heyəti səfirlikdə ümummilli lider Heydər Əliyevin büstünü ziyarət edib, qarşısına gül dəstələri düzüb.
Dövlət himnimizin səsləndirilməsilə başlayan görüşdə Diasporla İş üzrə Dövlət Komitəsinin fəaliyyətinə həsr olunmuş videoçarx nümayiş etdirilib.
Tədbirdə çıxış edən Dövlət Komitəsinin sədri Fuad Muradov rəhbərlik etdiyi qurumun fəaliyyəti, həyata keçirilən layihələr, 29 ölkə üzrə Koordinasiya şuralarının təsis olunması, 11 ölkədə Azərbaycan evinin yaradılıb soydaşlarımızın istifadəsinə verilməsi və Azərbaycan Diasporuna Dəstək Fonduna layihələrlə bağlı müraciət olunması qaydaları barədə ətraflı məlumat verib.
Qətərdə Azərbaycan icmasının bir il əvvəl yarandığına diqqəti cəlb edən soydaşlarımız Dövlət Komitəsinin sədrinə diaspor təşkilatının mütəşəkkilliyinə və sistemli şəkildə fəaliyyətinə nail olunmasının yolları, erməni lobbisinin ölkəmizə qarşı apardığı təxribatların qarşısının alınması üsulları barədə çoxsaylı suallar ünvanlayıblar.
Komitə sədri bildirib ki, diaspor fəaliyyətinin kökündə vətənpərvərlik dayandığı üçün bu iş soydaşlarımız tərəfindən daim aparılmalıdır. Xaricdə yaşayan soydaşlarımızın Vətənimizin maraqlarının müdafiə edilməsi, Azərbaycan həqiqətlərinin dünyada təbliğ olunması, erməni lobbisinin ölkəmizə qarşı apardığı antitəbliğatın qarşısının alınmasına dair bütün təşəbbüslərinin Dövlət Komitəsi tərəfindən dəstəkləndiyi vurğulanıb.
Soydaşlarımızın milli kimliyinin qorunması və mədəni irsimizin təbliği sahəsində yaxından fəaliyyətinə görə Nazənin Mehdiyevaya Dövlət Komitəsi adından təşəkkür plaketi təqdim edilib.
Tədbirdə Azərbaycanın Qətərdəki səfiri Rəşad İsmayılov da iştirak edib.
Bölmənin digər xəbərləri
