KOBİA rəsmisi: KOB-ların yaşıl transformasiyası məsələsinə sistemli yanaşma tətbiq edilməlidir
Bakı, 16 iyun, AZƏRTAC
Kiçik və orta biznes subyektlərinin (KOB) yaşıl transformasiyası məsələsinə sistemli yanaşma tətbiq edilməlidir.
AZƏRTAC xəbər verir ki, bunu İslam İnkişaf Bankının “Davamlı regional inteqrasiya üçün halal iqtisadiyyat” mövzusuna həsr olunmuş Halal İqtisadiyyat Liderlik Forumu (HELF) və Azərbaycan Halal Biznes Forumu 2026-nın (AZHAB Forum) “Halal mikro, kiçik və orta müəssisələr və dayanıqlılıq: Yaşıl keçid, halal dəyər zəncirləri və inklüziv iqtisadi artım” adlı sessiyasında çıxışı zamanı Kiçik və Orta Biznesin İnkişafı Agentliyinin (KOBİA) İdarə Heyəti sədrinin müşaviri Elnur Əliyev deyib.
“Bu sistemli yanaşmanı biz konkret proqram və əməkdaşlıq mexanizmi formasında həyata keçirməyə çalışdıq. Beləliklə, KOB-ların Yaşıl Keçidi üzrə Bakı Koalisiyasının yaradılması ideyası meydana gəldi. Bu təşəbbüsün əsas məqsədi apardığımız araşdırmalarda müəyyən etdiyimiz üç əsas problemi – məlumatlılıq çatışmazlığını, potensial məhdudiyyətlərini və maliyyəyə çıxış çətinliklərini – birgə şəkildə həll etməkdir. Koalisiya anlayışının bizim üçün iki mühüm ölçüsü var. Bir tərəfdən, bu, beynəlxalq tərəfdaşları bir araya gətirən qlobal əməkdaşlıq platformasıdır. Digər tərəfdən isə bizim üçün daha vacib olan milli səviyyədə əməkdaşlıqdır. Çünki dövlət qurumları, maliyyə institutları, biznes assosiasiyaları, beynəlxalq təşkilatlar və sahibkarlar eyni məqsəd ətrafında birləşməsələr, yaşıl keçidlə bağlı məqsədlərə nail olmaq çətin olacaq. Məhz buna görə də təşəbbüsümüzü 2024-cü ilin noyabrında təqdim etdik. Koalisiyanın təsis edilməsində bir sıra mühüm beynəlxalq tərəfdaşlar iştirak etdilər”, - deyə Elnur Əliyev bildirib.
KOBİA sədrinin müşavirinin sözlərinə görə, sonrakı mərhələdə ətraf mühit və iqlim sahəsində fəaliyyət göstərən yeni tərəfdaşlar da bu təşəbbüsə qoşulublar: “Hazırda koalisiya 13-dən çox tərəfdaş təşkilatı bir araya gətirir və fəaliyyət dairəsini genişləndirməyə davam edir. Koalisiyanın fəaliyyəti, həyata keçirilən layihələr və hazırlanmış analitik materiallar barədə daha ətraflı məlumat müvafiq internet resurslarında və xüsusi platformalarda yerləşdirilib. Bu məlumat bazası təşəbbüs çərçivəsində toplanmış biliklərin və təcrübələrin paylaşılmasına xidmət edir. Bu təşəbbüsün yaranma tarixçəsi və məqsədi məhz belə formalaşıb. Ümid edirəm ki, bugünkü forum da tərəfdaşlıq əlaqələrinin daha da genişlənməsinə və yeni əməkdaşlıq imkanlarının yaranmasına töhfə verəcək. İnanıram ki, yaşıl keçid yalnız texnoloji və ya maliyyə məsələsi deyil. Bu, eyni zamanda, insanların rifahı, gələcək nəsillərin maraqları və məsuliyyətli inkişaf modeli ilə bağlıdır. Biz insan mərkəzli inkişaf konsepsiyasına xüsusi önəm veririk. Bu yanaşmanın əsas mahiyyəti ondan ibarətdir ki, ətraf mühitin qorunması sonradan aradan qaldırılacaq problemdən daha çox, əvvəlcədən qarşısı alınmalı və davamlı şəkildə idarə olunmalı bir məsələdir. Başqa sözlə, dayanıqlı inkişafın təməlində proaktiv yanaşma dayanmalıdır. Biz yalnız problemlər yarandıqdan sonra reaksiya verməməli, onları əvvəlcədən nəzərə almalı və gələcək riskləri minimuma endirəcək siyasətlər həyata keçirməliyik”.
Fotoqraf - İlkin Cavanşirov
Bölmənin digər xəbərləri
