DÜNYA
Qəzza sektorunda indiyədək BMT-nin 241 əməkdaşı həlak olub
Bakı, 13 noyabr, AZƏRTAC
Müharibə başlayandan bəri Qəzza sektorunda həlak olan BMT əməkdaşlarının sayı 241 nəfərə çatıb.
AZƏRTAC xəbər verir ki, bu barədə BMT-nin Fələstindəki koordinasiya ofisi məlumat yayıb.
Bildirilib ki, həlak olanlar arasında BMT-nin Yaxın Şərqdəki Fələstinli Qaçqınlara Yardım Agentliyindən 237 nəfər var. Qalan dörd nəfər isə Ümumdünya Səhiyyə Təşkilatının, BMT İnkişaf Proqramının, Layihə xidmətləri idarəsinin, Mühafizə və təhlükəsizlik departamentinin əməkdaşlarıdır.
Eyni zamanda, İsrail ordusunun hücumları nəticəsində Qəzzada digər beynəlxalq humanitar təşkilatların 326 əməkdaşı, o cümlədən Fələstin Qırmızı Aypara Cəmiyyətinin 33 üzvü həlak olub.
Xatırladaq ki, 2023-cü il oktyabrın 7-də Qəzza sektorunda fəaliyyət göstərən HƏMAS hərəkatının İsrailin nəzarətində olan ərazilərə hücumundan sonra Yaxın Şərqdə vəziyyət kəskin şəkildə pisləşib. Nəticədə İsrail Fələstində, həmçinin Livan və Suriyanın bəzi rayonlarında hərbi əməliyyatlara başlayıb.
