Buraya toplaşanlar Azərbaycan rəhbərini səmimiyyətlə qarşıladılar.

Dövlətimizin başçısı əvvəlcə Quba, Xaçmaz və Dəvəçi rayonlarının kiçik və orta müəssisələri tərəfindən istehsal edilmiş məhsullarla tanış oldu.

Sonra mərasimi iqtisadi inkişaf naziri Fərhad Əliyev açdı.

İQTİSADİ İNKİŞAF NAZİRİ FƏRHAD ƏLİYEVİN

ÇIXIŞI

- Möhtərəm cənab Prezident!

Sizin bu tədbirdə iştirak etməyinizi biz əsası ümummilli liderimiz Heydər Əliyev tərəfindən qoyulmuş sahibkarlığa dövlət qayğısı siyasətinin məntiqi davamı kimi başa düşür və sahibkarlığın inkişafı ilə bağlı verdiyiniz tapşırıqların, qəbul edəcəyiniz qərarların lazımi səviyyədə yerinə yetirilməsi üçün bütün zəruri tədbirlərin bundan sonra da görüləcəyini bildiririk.

Sahibkarlığa Kömək Milli Fondu və banklar tərəfindən təşkil olunan bugünkü tədbir çərçivəsində Quba-Xaçmaz iqtisadi rayonunda fəaliyyət göstərən sahibkarlarla kredit təşkilatları arasında görüşün keçirilməsi və kredit müqavilələrinin imzalanması nəzərdə tutulmuşdur.

Möhtərəm cənab Prezident!

Hörmətli yarmarka iştirakçıları!

2002-ci ilin aprel-may aylarında ümummilli liderimiz Heydər Əliyevin sahibkarlarla keçirdiyi görüşlərin nəticəsi olaraq, qəbul edilmiş qərarlardan biri də Sahibkarlığa Kömək Milli Fondunun vəsaitlərinin istifadəsi qaydalarının təkmilləşdirilməsi və dövlət büdcəsindən bu məqsəd üçün ayrılan vəsaitlərin həcminin əhəmiyyətli dərəcədə artırılması olmuşdur. 2003-2005-ci illər üçün bu məbləğ 250 milyard manat təşkil edir. Təsdiq edilmiş qaydalara görə, kredit vəsaiti müsabiqə əsasında seçilən müvəkkil banklar vasitəsilə beş il müddətinə verilir və məqsədyönlü istifadə olunduğu halda, qarşılıqlı razılaşma əsasında onun ödənilmə müddəti uzadıla bilər. Kreditlərin maksimum məbləği 500 milyon manatdır və illik dərəcəsi 7 faizdən artıq olmamalıdır. Kreditlərin istifadəsində güzəşt müddəti müəyyən edilir.

Cənab Prezident, regionların sosial-iqtisadi inkişafına dair Dövlət proqramının icrasını sürətləndirmək, dövlət büdcəsindən sahibkarlığın inkişafı üçün ayrılan vəsaitlərin xüsusilə regionlarda yerləşdirilməsini təmin etmək məqsədi ilə Sahibkarlığa Kömək Milli Fondunun vəsaitinin istifadə qaydalarına Sizin 2004-cü ilin may ayında etdiyiniz düzəlişlərdən sonra kredit almaq bir az da asanlaşmışdır və qaydalar sadələşdirilmişdir. Yeni qaydalara əsasən, Fondun vəsaitinin istifadəsi üzrə müsabiqə komissiyasının tərkibinə dövlət qurumları ilə yanaşı, Azərbaycanda sahibkarlığın inkişafına maliyyə dəstəyi göstərən xarici maliyyə-kredit təsisatlarının və beynəlxalq təşkilatların nümayəndələri də daxil edilmişdir. Fondun vəsaitlərinin yerləşdirilməsinə kommersiya bankları ilə yanaşı, bank olmayan kredit təşkilatları da cəlb olunmuşdur. Mikrokreditlərin verilməsi məqsədi ilə vəsaitlərin müvəkkil kredit təşkilatların hesabına əvvəlcədən köçürülməsi qərara alınmışdır. Heç bir girov tələb olunmadan hər bir bank Fonddan 200 milyon manat məbləğində kredit ala bilir. Bu kreditlər haqqında məlumat verildikdən sonra banklara yeni tranş ayrılır.

Regionlarda həyata keçirilən layihələrin həcmi böyük olduqda, bəzi hallarda komissiyanın qərarı ilə kreditlərin məbləği 200 min dollara qədər artırıla bilər. Hazırda Fondun vəsaitinin yerləşdirilməsində 17 kommersiya bankı və bir bank olmayan kredit təşkilatı iştirak edir. 2003-cü ildə 310 sahibkarlıq subyektinə 57,3 milyard manat, 2004-cü ilin ötən dövrü ərzində 475 sahibkara 28,3 milyard manat güzəştli kredit verilmişdir. Bu ilin sonunadək veriləcək kreditlərin ümumi məbləği 100 milyard manata çatacaqdır. Ümumilikdə, 2003-2004-cü illər ərzində investisiya layihələrinin maliyyələşdirilməsinə 157,3 milyard manatın verilməsi nəzərdə tutulmuşdur.

Maliyyələşdirilmiş layihələrin 75 faizdən çoxu respublikanın regionlarının payına düşür və onların 94 faizi istehsal və emal yönümlüdür. Bu layihələrin həyata keçirilməsi nəticəsində 10 minə qədər yeni iş yerinin açılması nəzərdə tutulmuşdur. Hazırda Dövlət proqramında nəzərdə tutulmuş tədbirlərin həyata keçirilməsi, o cümlədən sahibkarlarla kredit təşkilatları arasında əlaqələrin genişləndirilməsi, kreditlərin verilməsində operativliyin artırılması məqsədi ilə bütün iqtisadi rayonlarda görüşlər keçirilir.

Cənab Prezident, Sizin tapşırığınıza uyğun olaraq, ilk belə görüş iyul ayının 13-də Şəki şəhərində keçirilmişdir. Şəki-Zaqatala iqtisadi rayonunun əhatə etdiyi Şəki, Zaqatala, Qax, Qəbələ, Oğuz, Balakən inzibati rayonları daxil olmaqla, orada 200-dən artıq sahibkara 10 milyard manatdan çox kredit verilmişdir. Həmin kreditlərin nəticəsində mindən artıq iş yerinin yaradılması nəzərdə tutulur.

Təqdirəlayiq haldır ki, bu təşəbbüsə digər banklar, bank olmayan kredit təşkilatları, habelə lizinq və sığorta şirkətləri də qoşulmuşlar. Bugünkü yarmarkada Fondla müqavilə bağlamış 16 bank, habelə müqavilə imzalamayan bank olmayan kredit təşkilatları, dörd sığorta şirkəti və üç lizinq şirkəti iştirak edir. Yarmarkada 415 hüquqi və fiziki şəxs 9,4 milyard manatdan artıq kredit ala biləcəkdir. Bunun da nəticəsində bölgədə 1300-dən artıq yeni iş yerinin açılması nəzərdə tutulur. Cənab Prezident, Sizin tapşırığınıza uyğun olaraq, ilin sonunadək digər iqtisadi rayonlarda da bu cür tədbirlər keçiriləcəkdir.

Yekunda Sizi əmin etmək istərdim ki, sahibkarlığın inkişafına yönəlmiş Heydər Əliyev siyasətinin həyata keçirilməsi, regionların iqtisadi inkişafının sürətləndirilməsi, sahibkarların problemlərinin həlli, onlardan ötrü əlverişli mühitin yaradılması və bunun nəticəsi olaraq yeni iş yerlərinin açılması, əhalinin güzəranının daha da yaxşılaşdırılması üçün bundan sonra da bütün imkanları səfərbər edəcəyik.

Cənab Prezident, Milli Olimpiya Komitəsinin Quba şəhərində belə bir şəraiti yaratdığı üçün, bu binanın Sizin dəstəyinizlə tikildiyini nəzərə alaraq, bu gün yarmarkada iştirak edən bütün iştirakçılar adından Sizə bir daha təşəkkür edirəm. Biz Quba şəhərində belə bir böyük tədbirin keçirilməsi üçün alternativ yer tapa bilmədik. Doğrudan da, belə bir möhtəşəm binada, Sizin iştirakınızla təməli qoyulmuş, inşa olunmuş və istifadəyə verilmiş kompleksdə bu tədbirin keçirilməsi bizi sevindirir. Biz Şəkidə də eyni tədbiri keçirərkən böyük bina tapa bilmədik və orada da idman kompleksindən istifadə etdik. Sahibkarlara dəstək verdiyiniz üçün Sizə bir daha minnətdarlığımızı bildiririk.

Dediyim kimi, bugünkü yarmarkanın əsəs məqsədi sahibkarlarla bankların işbirliyini təşkil etməkdir. Yəni sahibkarların kredit alması və bankların kredit verməsidir.

Cənab Prezident, icazənizlə, Sizin iştirakınızla bir neçə kredit sazişi imzalanardı.

X X X

Sonra Azərbaycan Prezidentinin iştirakı ilə Rabitəbank ilə Quba rayonu üzrə Qəçrəş müəssisəsi arasında meyvə-tərəvəzin qablaşdırılması, tara müəssisəsinin yaradılması ilə əlaqədar 490 milyon manatlıq saziş, ATAbank ilə fərdi sahibkar Vilayət Sərdarov arasında saziş, Texnikabank ilə Xaçmaz rayonunun Kardinal istirahət mərkəzi arasında 250 milyon manatlıq sazişlər imzalandı.

X X X

BANKLAR ASSOSİASİYASININ PREZİDENTİ

ZAKİR NURİYEVİN ÇIXIŞI

- Hörmətli cənab Prezident!

Hörmətli görüş iştirakçıları!

Cənab Prezident, əvvəlcə, icazə verin, vaxt tapıb bizimlə bu görüşdə iştirak etdiyiniz üçün bütün bank ictimaiyyəti adından Sizə təşəkkür edim.

Məlumunuz olduğu kimi, 2004-cü ildə Sizin banklar haqqında imzaladığınız yeni qanun qüvvəyə minmişdir. O, əvvəlki illərdə qəbul edilmiş qanundan xeyli fərqlənir, respublikamızda bank sisteminin dünya bank sisteminə uyğunlaşdırılmasına imkanlar yaradır. Hazırda Azərbaycan Respublikasında 106 kredit təşkilatı, o cümlədən 43 bank fəaliyyət göstərir. Respublikamızda bərqərar olmuş makroiqtisadi sabitliyin qorunması, inflyasiyanın orta səviyyəli Avropa standartlarına uyğun saxlanılması, milli valyutanın sabitliyinin təmin olunması, valyuta ehtiyatlarının artırılması və zəruri həddə qaldırılması, habelə bank islahatlarının hərtərəfli dərinləşdirilməsi, nəzarət sisteminin təkmilləşdirilməsi son dövrdə Azərbaycan bank sisteminin qarşısında duran əsas məqsədlər olmuşdur.

Demək olar ki, qarşıya qoyulmuş məqsədlərə nail olunmuş, pul-kredit siyasətinin təkmilləşdirilməsi istiqamətində mühüm işlər görülmüşdür. Bununla yanaşı, iqtisadi inkişaf templərinə uyğun gələn və bank-maliyyə sisteminin mövcud sabitliyinə xələl gətirməyən pul təkliflərinin addımı da təmin olunmuşdur. Respublikada mərkəzləşdirilmiş kredit üzrə uçot-faiz dərəcəsi 2002-ci ilin sonundan indiyədək 7 faiz həcmində qalmaqdadır ki, bu da MDB ölkələri içərisində ən aşağı göstəricidir. Bu günə milli valyutanın sabitliyi şəraitində ölkənin bank sisteminin inkişafında bankların aktivlərinin və öhdəliklərin həcminin artımı iqtisadiyyata kredit qoyuluşunun artımı, bank sisteminə olan inamın möhkəmləndirilməsi kimi müsbət meylləri formalaşdırmışdır.

Əvvəlki illərdə olduğu kimi, 2004-cü ildə də bank sektorunun təkmilləşdirilməsi, bank sistemi sabitliyinin artırılması bankların maliyyə vasitəçilik funksiyalarının keyfiyyətinin yüksəldilməsi və bank fəaliyyətinin beynəlxalq standartlara yaxınlaşması çərçivəsində həyata keçirilir. Bankların aktiv əməliyyatları sırasında müştərilərə verilən kreditlərin sürəti artmışdır. Kredit portfeli 2004-cü ilin əvvəlinə nisbətən cari ilin 6 ayı ərzində 400 milyard manat artaraq, 3,7 trilyon manata çatmışdır. Eyni zamanda, depozitlərin ümumi həcmi 2004-cü ilin əvvəli ilə müqayisədə 17,6 faiz artaraq, 3,7 trilyon manat olmuşdur. Əhalinin əmanətləri isə cari ilin 6 ayı ərzində ilin əvvəli ilə müqayisədə 25,4 faiz artaraq, 1,7 trilyon manata çatmışdır.

Hörmətli cənab Prezident, regionların sosial-iqtisadi inkişaf proqramının təsdiq olunması, onun konkret maliyyə mənbələri ilə təmin edilməsi bu proqramın həyata keçirilməsinin tam reallığını sübut edir. Azərbaycanda kiçik və orta sahibkarlığın inkişaf etdirilməsi məqsədi ilə yaradılmış Sahibkarlara Kömək Milli Fondunun fəaliyyət göstərdiyi iki ilə yaxın dövr ərzində bu mexanizm xeyli səmərəli metodlardan biri olduğunu sübut etdi. Fond vasitəsilə vəsaitlərin həm uzun müddətə, həm də xeyli aşağı faizlə (7 faiz) verilməsi bu işi xeyli maraqlı etmişdir. Bu, həm sahibkarlığın inkişafına, həm də sahibkarlığın xüsusi bir sahəsi olan bank sisteminin, onun regional şəbəkəsinin inkişafına təkan vermişdir.

Yaradılmış əlverişli şərait bankların bütövlükdə filiallarının sayının 318-ə çatmasına imkan vermişdir. Banklar bu filialları vasitəsilə nəinki kreditlərin verilməsini, eyni zamanda, kommunal ödənişlərin – həm respublikamızın paytaxtı Bakı şəhərində, həm də regionlarda - yığılmasını təmin edən elektron sistemlər qurmuşlar. Eyni zamanda, kommersiya bankları tərəfindən beynəlxalq maliyyə təsisatlarından da vəsaitlərin fəal cəlb edilməsi prosesi davam etmişdir. Hazırda kommersiya bankları Avropa və Yenidənqurma İnkişaf Bankından, İslam İnkişaf Bankından, Beynəlxalq Maliyyə Korporasiyasından, Almaniya-Azərbaycan Fondundan vəsaitləri cəlb edərək, sahibkarlığın və xüsusən regionlarda kiçik və orta sahibkarlığın inkişafına yönəltmişdir.

Hörmətli cənab Prezident, bu tədbirdə iştirak etdiyinizə görə bir daha təşəkkür edərək, bankların təşəbbüsünü dəstəklədiyiniz üçün Sizə bütün bank ictimaiyyəti adından minnətdarlığımızı bildiririk. Sizi əmin etmək istəyirik ki, kommersiya bankları bundan sonra digər regionlarda da bu cür yarmarkalar keçirəcək və sahibkarlığın inkişafı üçün zəruri olan maliyyə dəstəyini verəcəklər.

X X X

ATABANK HOLDİNQİN PREZİDENTİ ƏHMƏD ERENTOKUN ÇIXIŞI

- Hörmətli cənab Prezident!

Hörmətli xanımlar və cənablar!

Təməli ulu öndərimiz Heydər Əliyev tərəfindən qoyulmuş siyasi sabitlik və iqtisadi inkişafın bu gün Prezident İlham Əliyev tərəfindən layiqincə davam etdirilməsi, onun ardıcıllıqla imzaladığı dövlət proqramları və fərmanlar Azərbaycanı böyük dinamizmlə inkişaf etdirməkdədir. Görülən bu işlər Azərbaycanda, o cümlədən regionlarda qeyri-neft sektorunun inkişafının sürətləndirilməsi və problemlərin kompleks həll edilməsi üçün böyük tarixi əhəmiyyət kəsb edir.

Azərbaycandakı böyük canlanma, eyni zamanda, xarici iş adamları və maliyyə qurumları tərəfindən yüksək qiymətləndirilərək, ölkəyə daha böyük marağın olmasına imkan yaratmaqdadır.

Sahibkarlığa Kömək Milli Fondunun təkmilləşdirilməsi sahibkarlığın qeyri-neft sektorunun inkişafında vacib olan maliyyə problemlərinin həlli üçün çox mühümdür. Məhz bu gün hamımız bu məqsədlə bir yerə yığışmışıq və cənab Prezidentimizin bu tədbirdə iştirak edib bizim banklara, sahibkarlara dəstək verməsinə görə ona bir daha minnətdarlığımızı bildiririk.

Bu, iki ay ərzində bölgəyə ikinci səfərimizdir. Ümumiyyətlə, 7 dəfə səfər edərək, minlərlə sahibkarla görüşmüşük. Görüşlər nəticəsində 1117 layihə və 75 milyard manatlıq sifariş qəbul olunmuşdur. Bu gün bundan 608 layihəyə və 24 milyard manata yaxın kreditə qəbul rəyi verilmişdir. Həftənin sonunadək 457 layihə üzrə 11 milyard manatlıq kredit paylanacaqdır.

Vacib bir məsələni də demək istəyirəm ki, ATAbank bu gün ən baş sığorta şirkəti ilə imzaladığı müqavilə əsasında, girov qoya bilmədiyinə görə kredit ala bilməyən qaçqın və məcburi köçkünlər üçün Sahibkarlığa Kömək Milli Fondunun qaydaları ilə mikrokreditləri sığortalayaraq, girovsuz paylamağa başlayacaqdır. Yaxın vaxtlarda yaranmış Atalizinq firması ATAbankın maliyyə mənbəyinin xaricində bütün kənd təsərrüfatı və istehsalat sahəsində texnika və avadanlığa ehtiyacı olan sahibkarlara yeni imkanlar yaradacaqdır.

Azərbaycanın hər yerində böyük canlanma var, dövlət və hökumət qurumları, qeyri-dövlət təşkilatları və ictimai birliklər, təhsil ocaqları, sahibkarlar və Azərbaycanda çalışan xarici iş adamları birgə fəaliyyət göstərərək, ölkənin iqtisadiyyatını daha da möhkəmləndirmək üçün işləyirlər. Fəaliyyətimizlə əlaqədar ölkədə siyasi sabitliklə yanaşı, digər vacib amillər də mövcuddur. Bunlar Azərbaycanın coğrafi-siyasi vəziyyəti, enerji resursları və kənd təsərrüfatının zənginliyi, qədim mədəniyyəti, yüksək elmi və texniki potensialıdır. Ən əsası da cənab Prezidentimiz tərəfindən yaradılan hüquqi baza ilə sahibkarlara verilən xüsusi dəstəkdir.

İndi əlimizdə hər cür imkanlar vardır. Bizlərin vəzifəsi bunları birləşdirib gözəl məhsullar istehsal etmək, dünya bazarlarına çıxarmaq, Azərbaycanı regionda lider, dünyada bir addım öndə aparmaqdır. Diqqətinizə görə sağ olun.

X X X

QUBALI SAHİBKAR MƏSTAN ABDULLAYEVİN ÇIXIŞI

- Möhtərəm cənab Prezident!

Hörmətli tədbir iştirakçıları!

Fürsətdən istifadə edib, bu gözəl Quba torpağına gəldiyiniz üçün Sizə “Xoş gəlmisiniz!” deyirik.

Mən bir sahibkar kimi, bu gün çox sevinirəm. Ona görə ki, 7 faizlə heç bir təmənna olmadan, beşillik kredit almışam. Əlbəttə, bu yarmarka xalqımızın, dövlətimizin inkişafına böyük təkandır. Xahiş edərdim ki, belə tədbirlər tez-tez keçirilsin.

Möhtərəm cənab Prezident, Sizə, İqtisadi İnkişaf Nazirliyinə, Sahibkarlara Kömək Milli Fonduna və yarmarkada iştirak edən banklara dərin minnətdarlığımı bildirirəm. Sağ olun.

X X X

Dövlətimizin başçısı mərasimdə nitq söylədi.