Bakı, 9 fevral, AZƏRTAC

Təxminən dörd aydan sonra Bakıda birinci Avropa Oyunları başlayacaq. Yarışlarla əlaqədar ölkəmizə çoxsaylı qonaqların gələcəyini nəzərə alsaq, onların nəqliyyat məsələlərinin həlli öz aktuallığını saxlamaqdadır. Bu baxımdan “Azərbaycan Dəmir Yolları” QSC-nin üzərinə də mühüm vəzifələr düşür. Mövzu ilə əlaqədar “Azərbaycan Dəmir Yolları” QSC-nin sədr müavini Qurban Nəzirov AZƏRTAC-ın müxbirinin suallarını cavablandırıb:

- Qurban müəllim, ölkəmizdə keçiriləcək birinci Avropa Oyunlarına az vaxt qalır. Dəmir yolunda sərnişindaşımada keyfiyyətin yüksəldilməsi də bu baxımdan xüsusi önəm daşıyır. Bilmək istərdik, turistlərin dəmir yolu biletini daha asan əldə etmələri üçün elektron bilet satışı xidmətlərinin genişləndirilməsi istiqamətində hansı tədbirlər görülür?

- Dəmir yolu nəqliyyatında xidmət səviyyəsinin yaxşılaşdırılması, sərnişinlərə göstərilən xidmətlərin ən müasir standartlara cavab verməsi üçün bütün istiqamətlərə hərəkət edən sərnişin qatarlarına bilet satışı elektronlaşdırılaraq “onlayn” vasitəsilə təmin edilib. Respublika ərazisində bilet satışı kassalarda tam kompyuterləşdirilib, sərnişinlərin rahat və maneəsiz bilet əldə etmələri üçün bütün lazımi tədbirlər görülüb. “Qaynar xətt” şəbəkəsi yaradılıb, elektron ünvanlar müəyyən edilib. Eyni zamanda, sərnişin təsərrüfatına aid bütün məlumatlar saytda yerləşdirilib. Bundan başqa, Bakı sərnişin stansiyasının kassalarında post terminal aparatları da quraşdırılıb. Digər bilet kassalarında da post terminal aparatlarının quraşdırılması istiqamətində işlər aparılır. Bakı sərnişin stansiyasında və digər bilet satışı aparan kassalarda respublika daxili bilet satışının hər iki istiqamətə (gediş və gəliş), 2 nömrəli bilet kassasında isə Rusiya və Ukrayna dövlətlərinin ərazisində hərəkət edən sərnişin qatarlarına və geriyə bilet satışının təşkili təmin olunub.

- Birinci Avropa Oyunlarının keçirilməsi ilə bağlı nəqliyyat-yol kompleksi üzrə Tədbirlər Planına əsasən Bakı, Sumqayıt, Biləcəri, Balakən və Lənkəran dəmir yolu vağzallarında təmir işləri həyata keçirilməli idi. Vəziyyət nə yerdədir?

- Tədbirlər Planında nəzərdə tutulmuş işlər həyata keçirilməkdədir. Artıq Biləcəri, Lökbatan, Baş Sumqayıt dəmir yolu vağzallarında sərnişinlər üçün lazımi şərait yaradılıb. Balakən dəmir yolu vağzalının dam örtüyü tam, Gəncə vağzalı isə əsaslı təmir edilib. Digər vağzallarda da yenidənqurma işlərinin aparılması planlaşdırılır.

- Yarışlarla bağlı ölkəmizə çoxsaylı qonaqların gələcəyini nəzərə alsaq, dəmir yolu stansiyalarında məlumatların xarici dillərdə oxunması vacibdir. Bu baxımdan Bakı və Sumqayıt sərnişin stansiyalarında, eləcə də Gəncə vağzalında səsli məlumatların səsləndirilməsi üçün hansı tədbirlər görülür?

- Bakı və Sumqayıt sərnişin stansiyalarında, eyni zamanda, Gəncə vağzalında səsli məlumatların yayılması üçün hazırlıq işləri görülüb. Birinci Avropa Oyunlarının keçiriləcəyi müddətdə həmin məlumatların Azərbaycan, rus və ingilis dillərində səsləndirilməsi təmin olunacaq.

- Ölkəmizə gələn qonaqlar dəmir yolunun xidmətlərindən də yararlanacaq, respublikamızın səfalı guşələrinə səfər edəcəklər. Bu baxımdan sərnişin qatarlarında servisin yaxşılaşdırılması üçün hansı addımlar atılır?

- Azərbaycan son illər ərzində bir çox beynəlxalq və regional tədbirlərin arenasına çevrilib. Paytaxtımız bu yaxınlarda birinci Avropa Oyunları kimi mötəbər bir tədbirə ev sahibliyi edəcək. Bu sahədə ölkənin bütün müvafiq qurumların üzərinə məsuliyyət düşür. Bakıda keçiriləcək birinci Avropa Oyunları ilə bağlı Nəqliyyat Nazirliyi tərəfindən konkret kompleks tədbirlər proqramı hazırlanıb və biz də öz fəaliyyətimizi həmin proqrama uyğun həyata keçirəcəyik. İlkin məlumata görə, 49 ölkənin iştirak edəcəyi bu tədbirdə rəsmi heyətlərin ölkəyə gəlişi və gedişi üçün əsas nəqliyyat bağlantıları olaraq Heydər Əliyev Beynəlxalq Aeroportu, Bakı dəmir yolu vağzalı, avtomobil nəqliyyatı strukturları nəzərdə tutulur. Çalışacağıq ki, üzərimizə düşən vəzifələri vaxtında və yüksək səviyyədə icra edək.

Beynəlxalq sərnişin qatarlarında çalışan heyətlər, təlimatçılar və digər əlaqədar işçilər sərhəd-keçid məntəqələrində prosedur qaydaları ilə bağlı mütəmadi olaraq təlimatlandırılırlar. Birinci Avropa Oyunlarının keçiriləcəyi dövrdə onlar gücləndirilmiş iş rejimində çalışacaq və bu işlərə ingilis dilini bilən əməkdaşlar da cəlb olunacaqlar. Bununla əlaqədar Bakı vaqon deposunda briqada heyəti və bilet kassirlərinin ingilis dilini öyrənmələri üçün təlim kursları açılıb və hazırda həmin kurslarda təlim keçirlər. Yarışların keçiriləcəyi müddətdə əcnəbi turistlərin qarşılanması, onların yönləndirilməsi məqsədi ilə Bakı sərnişin stansiyasında Mədəniyyət və Turizm Nazirliyinin müvafiq qurumları ilə birlikdə informasiya mərkəziləri yaradılıb və lazımi avadanlıqlarla təchiz olunub. Eyni zamanda, Bakı sərnişin stansiyasında rəsmi nümayəndələr zalına ingilis və rus dillərində tərcüməçi işə götürülüb. Vaqon bələdçiləri və bilet kassirləri yeni xüsusi geyim formaları ilə təmin olunacaqlar.

Onu da qeyd edim ki, təkcə son illər ərzində Dövlət Proqramının icrası çərçivəsində Rusiya Federasiyasının və Ukraynanın vaqon təmiri zavodlarında 80 ədəd sərnişin vaqonu əsaslı təmir edilərək ölkəmizə gətirilib. Həmin vaqonlardan tərtib olunan sərnişin qatarları Bakı-Tbilisi, Bakı-Moskva, Bakı-Xarkov, Bakı-Ağstafa-Qazax və Bakı-Balakən istiqamətlərində xəttə buraxılıb. Köhnə vaqonların istismardan çıxarılaraq yeniləri ilə əvəz edilməsi işi davam etdirilir. Bu yaxınlarda 20 ədəd vaqon da təmir edilməsi üçün Ukraynaya göndəriləcək.

- Gəncədə tikilən vaqon istehsalı zavodunun inşası necə gedir?

- Qeyd edim ki, İsveçrənin “Stadler Rail Group” şirkəti ilə Azərbaycanın “Railway İnternational Distribution” Məhdud Məsuliyyətli Cəmiyyəti arasında Gəncədə vaqon istehsalı üzrə birgə müəssisənin yaradılması haqqında müqavilə imzalanıb. Müqavilənin şərtlərinə əsasən Gəncə şəhərində ilkin olaraq ildə 60 vaqon istehsal gücünə malik zavod inşa ediləcək. Bu zavod İsveçrə istehsalı olan ən son texnoloji avadanlıqla təchiz olunacaq. Bilirsiniz ki, ötən il oktyabrın 18-də “Stadler” Gəncə vaqon istehsalı zavodunun təməli qoyuldu və Prezident İlham Əliyev mərasimdə iştirak etdi.

İyirmi hektar ərazisi olan zavodun tikintisində və fəaliyyətində ekoloji standartlara cavab verən ən müasir texnologiya tətbiq ediləcək. Zavodun 2016-cı ildə fəaliyyətə başlaması nəzərdə tutulur. Bu zavodun işə düşməsi ilə Azərbaycan Dəmir Yolunun sərnişin vaqonu parkında yeni bir mərhələ başlayacaq. Gəncədə vaqon istehsalı zavodunun fəaliyyətə başlaması sərnişin vaqon parkını tam yeniləməyə imkan yaradacaq. İstehsal olunacaq vaqonların Türkiyə, Gürcüstan, Qazaxıstan, Özbəkistan, Türkmənistan və İrana satılması da nəzərdə tutulub.

Ceyhun Rüstəmov

AZƏRTAC-ın müxbiri