“QUŞ QRİPİ” İLƏ ƏLAQƏDAR NÖVBƏTİ MONİTORİNQƏ START VERİLDİ
Qurumun mətbuat mərkəzindən AZƏRTAC-a bildirmişlər ki, oktyabrın 25-də növbəti monitorinqə start verilmişdir. Dövlət Baytarlıq Xidmətinin, Ekologiya və Təbii Sərvətlər, Səhiyyə nazirlikləri mütəxəssislərinin iştirakı ilə aparılan aksiya Abşeron yarımadasını, Pirallahı adasını, Dəvəçi, Ağcabədi, Lənkəran rayonlarındakı milli qoruq və parkları, ölkənin dəniz sahili zonalarını əhatə edəcəkdir. Bundan əlavə, quşçuluq və şəxsi təsərrüfatlarda saxlanılan qanadlılardan da qan nümunələri götürüləcəkdir.
Monitorinq oktyabrın 29-da başa çatacaqdır. Götürülmüş qan və patoloji materiallar Respublika Baytarlıq Laboratoriyasında müayinə olunacaqdır.
Xatırladaq ki, sərhədlərdə baytarlıq nəzarəti məntəqələri ciddi iş rejimində fəaliyyət göstərir, rayonların baytarlıq idarələri kifayət qədər dezinfeksiyaedici maddələrlə təmin edilmişdir. Xəstəlik qeyd olunan ölkələrdən diri quş, quş məhsulları, yem və yem əlavələrinin gətirilməsinə, habelə köçəri quşların ovlanmasına qoyulmuş qadağa qüvvədə qalır.
Bölmənin digər xəbərləri
