“Rabitəbank” bu ilin III rübünün maliyyə hesabatını açıqlayıb
Bakı, 13 oktyabr, AZƏRTAC
Ölkənin aparıcı banklarından olan “Rabitəbank” bu ilin ilk 9 ayını əhatə edən maliyyə göstəricilərinə dair hesabatını ictimaiyyətə təqdim edib. Bu ilin III rübündə “Rabitəbank”ın mənfəəti 2022-ci ilin müvafiq dövrü ilə müqayisədə 33% və ya 4 milyon 142 min manat artaraq 16 milyon 817 min manat təşkil edib.
Bu barədə AZƏRTAC-a bankdan bildirilib. Qeyd olunub ki, ötən ilin müvafiq dövrü ilə müqayisədə bankın aktivləri 48.8 milyon və ya 5% artaraq 1 milyard 3 milyon manat təşkil edib. Hesabat dövründə bankın müştərilərə verdiyi kreditlərin həcmi 15% artaraq 701,5 milyon manat təşkil edib. Bu dövrdə bankın istehlak kreditləri 241,4 milyon manat (illik müqayisədə 17% çox), biznes kreditləri 334.6 milyon manat (illik müqayisədə 10% çox), daşınmaz əmlak kreditlərinin həcmi isə 125,5 milyon manat (illik müqayisədə 26% çox) təşkil edib.
Bankın qazandığı nailiyyətlərdən biri də faiz gəlirlərində olan müsbət dinamikasıdır. Belə ki, bankın faiz gəlirləri ötən ilin müvafiq dövrü ilə müqayisədə 33.44% artaraq 65,7 milyon manata çatıb. Qeyd edək ki, bankın qeyri-faiz gəlirlərində də əhəmiyyətli artım müşahidə edilib. Bu göstərici üzrə artım 11.7 % təşkil edib.
Hesabatdan görünür ki, bank dayanıqlı inkişaf üçün kifayət qədər yüksək kapital ehtiyatına malikdir və bankın kapitalı 7% artaraq 119,5 milyon manata çatıb.
Bölmənin digər xəbərləri
