Ramilia Əliyeva: Gürcüstanda Azərbaycanla bağlı xəbərlərin dəqiqliyini yoxlamaq üçün AZƏRTAC-a müraciət edirik
Bakı, 5 dekabr, Aytac Haqverdiyeva, Səfiyar Məcnun, AZƏRTAC
Gürcüstan ilə Azərbaycan coğrafi baxımdan və strateji mövqelərinə görə dünyada xüsusi önəm daşıyır. Hər iki ölkə qonşudur və uzun illərdir ki, həm iqtisadi, həm siyasi sahədə sıx əməkdaşlıq və strateji tərəfdaşlıq münasibətlərini qoruyur.
Bu sözləri AZƏRTAC-a məxsusi müsahibəsində Gürcüstanın İctimai Televiziyasının “Rəngarəng Gürcüstan” layihəsinin rəhbəri, jurnalist, televiziya aparıcısı Ramilia Əliyeva deyib.
O qeyd edib ki, dünyada informasiya axınının sürətlə artdığı və informasiya təhlükəsizliyi məsələlərinin hər zamankından daha vacib olduğu bir dövrdə yaxın qonşu və dost ölkələr olaraq media sahəsində əməkdaşlıq etmək xüsusi əhəmiyyət kəsb edir.
“Düşünürəm ki, bu sahədə əməkdaşlığımız daha da genişlənəcək. Azərbaycan və Gürcüstan mediası arasında birgə layihələr, fikir mübadiləsi və medialar üçün önəmli məsələlərin müzakirəsi davamlı xarakter alacaq. Bu, hər iki ölkənin media sahəsinin inkişafına töhfə verəcək. Çünki media canlı bir orqanizmdir və gündəlik olaraq inkişaf edir. İki fərqli ölkənin medialarının bir-biri ilə təcrübə paylaşması, ortaq layihələr həyata keçirməsi bu inkişafı sürətləndirir. Eyni zamanda, bu, jurnalistlər üçün etibarlı informasiya mənbələri yaratmaq baxımından da böyük önəm daşıyır. Gürcüstan və Azərbaycan mediasının bir-birini tanıması, bir-birinin işinə bələd olması həm də etibarlı informasiya mühitinin formalaşmasına xidmət edir”, - deyə R.Əliyeva vurğulayıb.
O, Gürcüstanın İctimai Televiziyasında yayımlanan Azərbaycanla bağlı xəbərlərin etibarlı mənbələrə istinad etdiyini bildirib: “Mən şəxsən Gürcüstanda Azərbaycan xəbərlərini bir neçə media vasitəsilə izləyirəm və etibarlı mənbə olaraq qiymətləndirirəm. Onlardan biri, əlbəttə ki, AZƏRTAC-dır. İşlədiyim media qurumunda da xəbərlərin dəqiqliyini yoxlamaq üçün tez-tez AZƏRTAC-a müraciət edirik. Düşünürəm ki, media qurumlarının peşəkarlığı və etibarlılığı onların jurnalistlər üçün etibarlı mənbə kimi tanınmasının əsas göstəricisidir.
Yekun olaraq demək istərdim ki, jurnalist üçün etibarlı mənbədə işləmək və bu mənbənin yaratdığı informasiya mərkəzinin bir hissəsi olmaq həm peşəkarlıq, həm də fəxr ediləsi bir haldır”.
Bölmənin digər xəbərləri
