REGİONAL MƏSƏLƏLƏR DAİMİ KOMİSSİYASININ İCLASI KEÇİRİLMİŞDİR

25.02.2004 [23:53]
Çap et
A⁺ A^-

Milli Məclisin Resgional məsələlər daimi komissiyasının fevralın 25-də keçirilən iclasında “Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında”, “Büdcə sistemi haqqında” Qanunun tətbiqi ilə əlaqədar bəzi qanunlara əlavələr və dəyişikliklər edilməsi haqqında”, “Bələdiyyə icmalarının regional assosiasiyalarının yaradılması haqqında” qanun layihələri müzakirə olunmuşdur.

AZƏRTAC-ın müxbiri xəbər verir ki, iclasda bələdiyyələrin əlaqələndirmə şuralarının rəhbərləri, şəhər bələdiyyələrinin nümayəndələri iştirak etmişlər.

Deputat Tahir Rzayev “Bələdiyyələrin statusu haqqında”, “Bələdiyyələrin su təsərrüfatı haqqında”, “Bələdiyyələrin maliyyəsinin əsasları haqqında” qanunlara edilən dəyişikliklər barədə məlumat vermişdir.

Sonra komissiya sədrinin müavini Şaitdin Əliyev qurumun 2003-cü il payız sessiyası dövründə gördüyü işlər barədə məlumat vermişdir. O demişdir ki, Azərbaycan Prezidenti İlham Əliyevin “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” Fərmanı ilə əlaqədar olaraq komissiya üzvləri bələdiyyələrlə mütəmadi, məqsədyönlü iş aparmış, müvafiq tövsiyələr vermişlər.

Sonda deputatlar qanun layihələrinin parlamentin müzakirəsinə çıxarılmasını tövsiyə etmişlər.