Rəsmi Paris Əlcəzair parlamentinin Fransanın müstəmləkəçilik dövrü ilə bağlı qəbul etdiyi qanundan hiddətlənib
Paris, 25 dekabr, AZƏRTAC
Əlcəzair parlamentinin Fransanın müstəmləkəçilik dövrünü cinayət kimi tanıyan qanun qəbul etməsinə bu ölkənin xarici işlər naziri Jan-Noel Barro münasibət bildirib.
AZƏRTAC BFM TV-yə istinadla xəbər verir ki, nazir bu sənədi “açıq-aşkar düşmən təşəbbüs” kimi qiymətləndirib.
Fransa Xarici İşlər Nazirliyinin açıqlamasında vurğulanıb ki, bu addım Fransa–Əlcəzair dialoqunun bərpası və iki ölkə arasında tarixi yaddaşla bağlı məsələlərin sakit və konstruktiv müzakirəsi niyyəti ilə ziddiyyət təşkil edir.
Xatırladaq ki, dekabrın 24-də Əlcəzair parlamenti 1830–1962-ci illər Fransa müstəmləkəçiliyinə görə bu dövlətin hüquqi məsuliyyətini təsbit edən və rəsmi üzr istənilməsini nəzərdə tutan qanunu yekdilliklə qəbul edib.
Fransa isə Əlcəzairlə münasibətlərdə tələbkar, lakin açıq dialoqu davam etdirmək niyyətində olduğunu bildirib. Xüsusilə təhlükəsizlik və miqrasiya məsələləri üzrə əməkdaşlığın davam etdirilməsinin Fransa və bu ölkə vətəndaşlarının əsas maraqlarına cavab verdiyi vurğulanıb.
Bölmənin digər xəbərləri
