RESPUBLİKA AĞSAQQALLARININ YIĞINCAĞI KEÇİRİLMİŞDİR
AZƏRTAC-ın müxbiri xəbər verir ki, yığıncaqda Naxçıvan Muxtar Respublikasının 80 illik yubileyinin keçirilməsi ilə əlaqədar ölkəmizin Prezidentinin 9 fevral 2004-cü il tarixli Sərəncamı ilə əlaqədar ağsaqqalların görəcəyi işlər müəyyənləşdirilmişdir.
Yığıncağı giriş sözü ilə açan respublika Ağsaqqallar Şurasının sədri akademik Budaq Budaqov Prezidentin Sərəncamını tarixi əhəmiyyətli sənəd adlandırmışdır.
Ağsaqqallar Şurasının üzvü Ramazan İsmayılov Naxçıvan Muxtar Respublikası yaradılmasının 80 illiyi haqqında məruzə etmişdir.Natiq bildirmişdir ki, ölkəmizin ayrılmaz hissəsi olan Naxçıvan Muxtar Respublikası blokada şəraitində yaşayır, mübarizə aparır, inkişaf edir. Bu yubiley tarixlər şahidi ulu Naxçıvanın halal haqqıdır. Naxçıvanın 3500 illik tarixi vardır. Biz bu yubileyə də hazırlaşmalı, onun beynəlxalq səviyyədə keçirilməsinə nail olmalıyıq.
Məruzə ətrafında müzakirələrdə Ağsaqqallar Şurası sədrinin müavini, akademik Fuad Qasımzadə, Binəqədi Rayon Ağsaqqallar Şurasının sədri Böyükkişi Əbilov və başqaları çıxış etmiş, bir sıra təkliflər vermişlər.
Respublika ağsaqqallarının yığıncağı müzakirə olunan məsələ barədə geniş qərar qəbul etmişdir.
Bölmənin digər xəbərləri
