Respublika Gənclər Kitabxanasında cərrah, türkoloq alim Cavad Heyətinin xatirəsi anılıb
Bakı, 23 may, AZƏRTAC
Dünyaşöhrətli Azərbaycan cərrahı, Türk dünyasının görkəmli alimi və ictimai xadimi, professor Cavad Heyətin anadan olmasının 100 illiyi münasibətlə Cəfər Cabbarlı adına Respublika Gənclər Kitabxanasında “Cavad Heyət məfkurəsi-vahid Azərbaycan!” adlı biblioqrafik icmal və videomaterial hazırlanıb.
Kitabxanadan AZƏRTAC-a bildirilib ki, biblioqrafik icmalda Ulu Öndər Heydər Əliyev və Azərbaycan Respublikasının Prezidenti İlham Əliyevin dünyaşöhrətli alimlə olan görüşləri yer alıb. Eyni zamanda görkəmli şəxslərin Cavad Heyət haqqında söylədikləri dəyərli fikirlər, akademik Rəfael Hüseynovun “Cavad Heyət varlığı”, “Cavad Heyətin dəfninin gizlinləri: doktorun varisi nələrı açıqladı?” başlıqlı məqalələrin tam mətni təqdim edilir.
Hazırlanan materialda Cavad Heyətinin qələminin məhsulu olan “Mühakimətül-lüğəteyn - İki dilin mübahisəsi”, “Qərb fəlsəfəsi tarixi”, “Dilimiz, ədəbiyyatımız və kimliyimiz uğrunda”, “Türk dilləri və ləhcələrinin tarixi”, “Azərbaycan şifahi xalq ədəbiyyatı” və onun haqqında nəşr edilən “Azərbaycan Türk fəlsəfi və ictimai fikir tarixi”, “Nizaminin türklüyü və türklüyə münasibəti Azərbaycan nizamişünaslığında”, “Elm xəzinəsini zənginləşdirənlər” kimi 20-dən çox kitabın biblioqrafik təsviri və qısa annotasiyası təqdim edilir.
Kitabxananın rəsmi saytında yerləşdirilən https://ryl.az/funds/biblioqrafik-icmal icmalda 2015-2025-ci illərdə görkəmli türkoloq haqqında dövrü mətbuatda çıxan məqalələrin siyahısı da yer alır.
Kitabxana əməkdaşları tərəfindən hazırlanan videomaterialda professor Cavad Heyətin zəngin və çoxşaxəli səmərəli fəaliyyətində mühüm yer tutan Azərbaycan ədəbiyyatı tarixi, türk xalqlarının keçmişi, milli folklor və eləcə də islamşünaslığa həsr edilən tədqiqatlar haqqında geniş məlumat verilir, görkəmli alimin ikisi fars və beşi də türk dilində olan yeddi cildlik türkologiya kitabının müəllifi olması diqqətə çatdırılır. Materialda Cavad Heyətin “Varlıq” dərgisinin təsisçisi olması və 36 ildən çox, türk və fars dillərində yayılan bu ədəbi-mədəni dərgini nəşr etdirdiyi haqda məlumat verilir. Videomaterialda görkəmli alimin müxtəlif beynəlxalq konfrans, görüş və tədbirlərdə lentə alınan fotogörüntüləri də sərgilənir. Görkəmli alimin 100 illik yubileyi çərçivəsində hazırlanan material kitabxananın rəsmi saytında https://ryl.az/multimedia/cavad-heyet-100 yerləşdirilib.
Bölmənin digər xəbərləri
