Rəssam Eldar Babazadə: Kollektiv iş həm xalqları, həm də dövlət institutlarını birləşdirir
Bakı, 12 dekabr, Anara Axundova, AZƏRTAC
AZƏRTAC Türk dünyasının mədəniyyəti və incəsənəti mövzusunda söhbətlər silsiləsini davam etdirir. Bu dəfə qonağımız yaradıcılığı Azərbaycanda və onun hüdudlarından kənarda yaxşı tanınan rəssam Azərbaycan Rəssamlar İttifaqının üzvü Eldar Babazadə oldu. Onun əsərləri Rusiyanın, Türkiyənin, İranın, Almaniyanın, İsveçrənin və daha bir çox ölkənin ən nüfuzlu sərgi məkanlarında nümayiş etdirilib. Rəssam, həmçinin türk ölkələrinin nümayəndələri üçün təşkil olunmuş kollektiv sərgilərdə və tədbirlərdə dəfələrlə iştirak edib.
“Türk dövlətlərinin rəssamlarının sərgisində iştirak etmişdim,– tədbir Qırğızıstanda, İssık-Kul gölündə keçirilirdi və 15 gün davam etdi. Orada bütün Türk dünyasından rəssamlar var idi. Biz plenerlər keçirir, təbiəti rəsmlərlə təsvir edirdik. Hər bir ölkə öz milli mətbəxini, milli oyunlarını təqdim edirdi – çox maraqlı idi! Bu tədbir mənə xoş gəldi. O zaman mən öz rəsmlərimdən birini Qırğızıstanın etnoqrafiya muzeyinə hədiyyə etdim.
Keçən il Başqırdıstana səfər etmişdim. Orada biz keçə hazırlayırdıq və hər bir rəssam kiçik bir element, kompozisiya hazırladı. Sonra isə bütün bu elementləri bir böyük pannoda birləşdirdik. Mən həyatımda ilk dəfə keçə ilə işləməyi sınadım – dəvəni və onun üstündə qollarını açmış vəziyyətdə oturan insanı təsvir etdim.
Yaxınlarda isə Milli Xalça Muzeyində türk ölkələri rəssamlarının sərgisi keçirildi və mən orada iştirak etdim. Sərgi milli silahlanma mövzusuna həsr olunmuşdu, burada biz rəsmlərimizdə öz ölkələrimizin silahlarını göstərdik”, – deyə rəssam bildirib.
Eldar Babazadənin fikrincə, türk ölkələrinin nümayəndələri üçün birgə layihələr çərçivəsində birləşmək çox vacibdir.
“Birləşmə müəyyən nəticələrə gətirib çıxarır. Deyildiyi kimi, bir nəfər döyüşçü deyil. Bir şeyi təkbaşına etmək çox çətindir. Birləşmə isə vacibdir, çünki bir-birinə dəstək baş verir, bir-birinin mədəniyyəti öyrənilir. Hər bir ölkənin müəyyən milli xüsusiyyətləri var. Kollektiv iş həm xalqları, həm də dövlət institutlarını birləşdirir. Birgə layihələr isə daha geniş, daha zəngin olur və onların həyata keçirilməsi daha mümkündür”, – deyə müsahibimiz qeyd edib.
Eldar Babazadənin sözlərinə görə, türk ölkələrinin mədəniyyətini və incəsənətini inkişaf etdirmək üçün simpoziumlar, birgə sərgilər, yaradıcılıq səfərləri təşkil etmək lazımdır.
“Müxtəlif dövlətlərin bu və ya digər rəssamlarının işlərində hansısa milli xüsusiyyət mövcuddur. Buna görə də bir-birinin mədəniyyətini, incəsənətini və iş texnikasını öyrənmək, muzeyləri, sərgiləri ziyarət etmək çox vacibdir. Müəyyən ümumi köklər var. Bu köklərin müxtəlif şaxələri var və hər bir xalq bu ümumi kök əsasında öz dünyagörüşünü inkişaf etdirib. Biz birləşəndə isə yaxşı sintez yaranır. Bu baxımdan incəsənət hərəkətverici qüvvədir!”, – deyə rəssam vurğulayıb.
Bölmənin digər xəbərləri
