Gəncə, 23 noyabr, Vüsalə Cənnətova, AZƏRTAC

Təsviri incəsənətin ən qədim növlərindən olan rəssamlıq sahəsində uğur qazanmaq üçün onu ruhunun bir parçası olaraq qəbul etmək lazımdır. İstedad, görməyi və yaratmağı bacarmaqla yanaşı, öyrənmək, yeni ideyalara sahib olmaq, daim öz üzərində işləmək və inkişaf etmək də mühüm şərtlərdir. Bütün bunları özü üçün əsas bilib, həyatını rəssamlıqla bağlayanlardan biri 38 yaşlı Davud Bayramovdur. Gəncəli rəssam AZƏRTAC-ın bölgə müxbirinə rəssamlığa sevgisindən, fəaliyyətindən, gələcək planlarından söz açıb.

Deyir ki, rəsm çəkməyə uşaq yaşlarından başlayıb, zaman keçdikcə bu sahəyə bağlanıb. Özünün təbirincə desək, illərdir ki, rənglərin və fırçanın sehrindədir. “İşlərimi yağlı boyalarla kətan üzərində işləyirəm. Yerli rəssamlardan dərs almışam, kitablar oxumuşam, əcnəbi sənətkarların texnikalarını öyrənməyə çalışmışam. Öz üzərimdə daha çox işləyib, bu sahədə bacarıqlarımı inkişaf etdirməyə səy göstərirəm”, - deyən realist baxış tərzinə malik rəssam əl işlərini ərsəyə gətirərkən portret, mənzərə, məişət, natürmort janrına müraciət edir.

Davud Bayramov bir əl işi üçün 20-30 gün vaxt sərf etdiyini bildirir: “Divar rəsmləri də çəkirəm. Əsasən isə portret janrına üstünlük verirəm, sifarişləri belə əl işləri üçün alıram. İstedadlı rəssam portretdə insanın ən səciyyəvi xüsusiyyətlərini ümumiləşdirməyi bacarmalıdır. Çalışıram ki, işlərim onları izləyənlərə müsbət təsir bağışlasın”.

İndiyədək rəsm əsərləri müxtəlif yerli, həmçinin Türkiyə və Fransada təşkil edilən sərgilərdə nümayiş olunub. Onlayn sərgilər də rəssama sənətini nümayiş etdirmək üçün geniş imkanlar açır. “Təbii ki, sərgilərin keçirilməsi rəssamlar üçün motivasiya mənbəyidir. Öz işlərini tanıtmaqla yanaşı, şəhərini, ölkəni də təbliğ edə bilirsən. Bu isə başqa bir qürur verir. Odur ki, daha çox sərgidə iştirak etməyə həvəs göstərirəm. Ölkəmizdə rəssamlığın inkişafı üçün münbit şərait var, bu da sevindiricidir”, - deyən Davud Bayramovun ən böyük arzularından biri Azərbaycanın dahi şəxsiyyətlərinin və tarixi abidələrinin təsvirlərini yaratdığı tabloları ilə şəxsi sərgisini keçirməkdir.