Rəy sorğusu Prezident İlham Əliyevə yüksək ictimai etimadı təsdiqləyir ŞƏRH
Bakı, 3 iyul, AZƏRTAC
Sonuncu dəfə keçirilən rəy sorğusunun nəticələri, əslində, Azərbaycan ictimai fikrinin və Azərbaycan xalqının Prezident İlham Əliyevə münasibətinin rəqəmlərlə ifadəsidir. Sorğuda iştirak edən respondentlərin 87,7 faizinin dövlət başçısına etimad göstərməsi, 93,6 faizinin isə onun fəaliyyətini müsbət qiymətləndirməsi olduqca mühüm göstəricidir.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu söyləyib.
Deputat bildirib ki, etimad göstəricisinin bu qədər yüksək olması, ilk növbədə, Azərbaycan xalqının Prezident İlham Əliyevə inanması ilə bağlıdır.
"İnsanlar yalnız etimad göstərmir, eyni zamanda, ona inanırlar. Mən hesab edirəm ki, bu inamın və etimadın çox dərin səbəbləri var. Hətta düşünürəm ki, daha genişmiqyaslı rəy sorğusu keçirilsəydi, etimad göstəricisi bundan da yüksək ola bilərdi. Nəticə etibarilə, bu rəqəmlər Azərbaycan cəmiyyətində formalaşmış ümumi ictimai ovqatı əks etdirir. Prezident İlham Əliyevin fəaliyyətinin 93,6 faiz respondent tərəfindən müsbət qiymətləndirilməsi də xüsusi əhəmiyyət daşıyır.
Uzun illər etimadsızlıq şəraitində yaşamış, ictimai qorxu və məğlubiyyət sindromunu yaşamış bir xalqın həm dövlətin etibarını, həm də liderə olan etimadını yenidən bərpa edən şəxsə bu cür münasibət göstərməsi olduqca yüksək qiymətləndirilməlidir. Bu, Azərbaycan siyasi təfəkkürünün və milli yaddaşının dərinliklərində özünə mühüm yer tutmuş hadisədir", – deyə deputat bildirib.
O xatırladıb ki, 1990-cı illərin əvvəllərində dövlət institutlarına inam ciddi şəkildə sarsılmışdı. Ümummilli Lider Heydər Əliyevin hakimiyyətə qayıdışı ilə dövlətə etimadın bərpası prosesi başlandı. Prezident İlham Əliyevin rəhbərliyi dövründə isə bu etimad daha da möhkəmləndi və özünün ən yüksək zirvəsinə 44 günlük Vətən müharibəsində çatdı. Azərbaycan xalqını 2003, 2008, 2013 və 2018-ci illərdə keçirilən prezident seçkilərində İlham Əliyevə səs verməyə sövq edən əsas amillərdən biri də məhz bu inam və etimad idi. İnsanlar inanırdılar ki, torpaqlarımızı işğaldan məhz İlham Əliyev azad edəcək. Ona görə də ona etimad göstərirdilər. Vətən müharibəsində qazanılan tarixi Zəfər xalqın bu etimadını tam doğrultdu.
“Qırx dörd günlük Vətən müharibəsinin belə möhtəşəm və qəti qələbə ilə başa çatacağı barədə müxtəlif fikirlər var idi. Lakin Azərbaycan Prezidenti xalqımıza arzuladığımız qələbənin ən yüksək və ən möhtəşəm nümunəsini bəxş etdi. Bu, xalqın inamının tam doğrulduğunu göstərdi. Ancaq məsələ bununla da bitmir. Prezident İlham Əliyevin rəhbərliyi ilə 2023-cü ildə əldə olunan tam suverenlik Azərbaycanın yüzillik dövlətçilik tarixində mühüm mərhələyə çevrilib. Prezident İlham Əliyev təkcə son 30-35 illik müstəqillik dövrünün problemlərini həll etmədi. O, 2023-cü ildə Müzəffər Ordunun Ali Baş Komandanı kimi Azərbaycanın dövlətçilik tarixində təxminən 100 illik problemi aradan qaldırdı. 1923-cü ildə Azərbaycanın dövlətçilik təməllərinin altına mina kimi yerləşdirilmiş qondarma “Dağlıq Qarabağ” probleminə son qoyuldu. Məhz buna görə də bu etimadın əsas səbəblərindən biri yalnız son otuz ilin deyil, bütövlükdə yüzillik milli arzunun reallaşdırılmasıdır. Prezident İlham Əliyev milli maraqlarımızı təmin etməklə xalqın ən yüksək etimadını qazandı", – deyə deputat bildirib.
Deputat hesab edir ki, daha geniş və əhatəli sosioloji tədqiqat aparılacağı təqdirdə etimad göstəricisi daha yüksək ola bilər.
“Fəaliyyətin yüksək qiymətləndirilməsi isə ölkəmizin hərtərəfli inkişafı, beynəlxalq münasibətlər sistemində mövqeyinin güclənməsi, Azərbaycanın regional və qlobal nüfuzunun artması, Böyük Qayıdış proqramının uğurla həyata keçirilməsi və digər mühüm nailiyyətlərlə bağlıdır. Hesab edirəm ki, bu iki göstərici – etimad və fəaliyyətə verilən yüksək qiymət – bir-birini tamamlayan və Azərbaycan cəmiyyətində formalaşmış ictimai inamın real ifadəsi olan göstəricilərdir”, - deyə H.Babaoğlu əlavə edib.
Müxbir - Səbinə Əlizadə
Bölmənin digər xəbərləri
