Riqada 20 Yanvar şəhidlərinin xatirəsi yad edilmişdir
Riqa, 20 yanvar (AZƏRTAC). Bakıda yanvar faciəsinin 22-ci ildönümü münasibətilə bu gün Riqada anım mərasimi keçirilmişdir.
20 yanvar Latviyada da hüzn günüdür. Bu gün ölkə 1991-ci il 20 yanvar faciəsi qurbanlarının - barrikada müdafiəçilərinin xatirəsini yad edir.
Tədbir başlanmazdan əvvəl Azərbaycanın Latviyadakı səfirliyinin əməkdaşları, Azərbaycan diasporu və Latviya hökumətinin üzvləri barrikada müdafiəçilərinin xatirəsini ehtiramla yad etmiş və Azadlıq Abidəsi önünə tər çiçəklər qoymuşlar.
Sonra Riqadakı 1 nömrəli dövlət gimnaziyasında matəm mərasimi keçirilmişdir. Mərasimdə Azərbaycanın Latviyadakı səfiri Elman Zeynalov, səfirliyin əməkdaşları, Latviya Seyminin deputatı A.Sakovski, Azərbaycan diasporunun və Latviya ictimaiyyətinin nümayəndələri iştirak etmişlər.
Səfir E.Zeynalov tədbirdə çıxış edərək 1990-cı il yanvarın 20-də Bakıda baş vermiş faciəli hadisələrə, bütövlükdə SSRİ-nin dağılması tarixinə qısa nəzər salmışdır. Özü bu dəhşətli hadisələrin şahidi olduğunu qeyd edən səfir tədbir iştirakçılarının diqqətinə çatdırmışdır ki, yanvarın 19-dan 20-nə keçən gecə Bakıya sovet qoşunları və ağır zirehli texnika yeridilmiş, nəticədə 134 adam öldürülmüş, 700-dən çox adam müxtəlif dərəcəli xəsarətlər almışdır. Bu faciənin təqsirkarları hələ də cəzalandırılmamışlar, əksinə, onlar sülh uğrunda Nobel mükafatı alır, dünyanın gələcəyi barədə mülahizələr söyləyirlər. Bu gün Bakıda insanlar Azərbaycanın müstəqilliyi uğrunda canlarından keçmiş Vətən övladlarının xatirəsini yad etmək üçün axın-axın Şəhidlər xiyabanına gedirlər.
Səfir 1991-ci il yanvarın 20-də Latviyada baş vermiş hadisələrlə əlaqədar başsağlığı vermişdir. E.Zeynalov vurğulamışdır ki, bu gün Azərbaycan diasporu bütün Latviya xalqı ilə həmrəy olduğunu göstərmişdir.
Latviya ictimaiyyətinin nümayəndələri 1990-cı il yanvarın 20-də Bakıda baş vermiş hadisələrlə əlaqədar başsağlığı verərək vurğulamışlar: “Əsas məsələ bu hadisələri yadda saxlamaq, unutmamaq və imkan daxilində bu informasiyanı yaymaqdır”. Natiqlər Azərbaycan xalqının bir də belə faciələrlə üzləşməməsini, Azərbaycanın dinamik inkişafının davam etməsini arzulamışlar.
Latviya Seyminin deputatı, Latviya-Azərbaycan parlamentlərarası dostluq qrupunun sədri Aleksandr Sakovski demişdir ki, siyasi liderlərin vəzifəsi öz ölkələrində tarixi prosesləri düzgün əks etdirməkdən ibarətdir. Ən başlıcası, insanlar tarixin bu dərslərini yadda saxlamalı və nəticə çıxarmalıdırlar. Deputat demişdir: “Latviya-Azərbaycan dostluq qrupunun sədri kimi mən Latviyada Azərbaycanın bir dövlət kimi tarixini düzgün və obyektiv başa düşülməsini vacib hesab edirəm.
“Ocaq” Azərbaycan mədəniyyəti cəmiyyətinin sədri Roman Əliyev demişdir ki, Azərbaycan o dəhşətli gecədə Azərbaycan tarixinə parlaq bir səhifə yazmış, ölkənin milli azadlığına və müstəqilliyinə yol açmış şəhidlərin xatirəsini ehtiramla yad edir.
R.Əliyev Bakıda baş vermiş faciəli hadisələrlə əlaqədar matəm mərasiminin keçirilməsi üçün yer verdiyinə görə, habelə bu il tədris müəssisəsində Qara Yanvara həsr edilmiş dərs keçilməsinə görə gimnaziyanın direktoruna təşəkkür etmişdir.
Tədbirin sonunda “Qanlı Bakı” sənədli filmi nümayiş etdirilmişdir.
Nigar Hüseynova
AZƏRTAC-ın xüsusi müxbiri
Riqa
Bölmənin digər xəbərləri
