Rotterdamda “Biz Qalib Xalqıq!” adlı bayram tədbiri təşkil olunub
Rotterdam, 28 dekabr, AZƏRTAC
Niderlandın Rotterdam şəhərində “Heydər Əliyev İli” çərçivəsində Dünya Azərbaycanlılarının Həmrəyliyi Günü və Yeni il münasibətilə “Biz Qalib Xalqıq!” adlı bayram tədbiri keçirilib.
AZƏRTAC xəbər verir ki, Diasporla İş üzrə Dövlət Komitəsinin dəstəyi və “Ana Vətən” Avropa Azərbaycanlı Qadınlar Birliyinin təşkilatçılığı ilə keçirilən tədbirdə Azərbaycanın Niderlanddakı səfirliyinin, Türkiyənin Amsterdamdakı baş konsulluğunun əməkdaşları, Niderland, Belçika və Almaniyada yaşayan soydaşlarımız, Güney azərbaycanlılar, Niderlanddakı türk icmasının və mediasının təmsilçiləri iştirak ediblər.
Əvvəlcə Azərbaycanın Dövlət Himni səsləndirilib. Ölkəmizin suverenliyi və ərazi bütövlüyü uğrunda mübarizədə canlarından keçmiş şəhidlərimizin xatirəsi bir dəqiqəlik sükutla yad edilib.
“Real TV”nin Avropa bürosunun xüsusi müxbiri, jurnalist və ictimai fəal Xatirə Sərdarqızının moderatorluğu ilə keçən tədbirdə Ulu Öndər Heydər Əliyevin fəaliyyəti və Azərbaycan diasporunun inkişafındakı rolu haqqında məlumat verilib. Ulu Öndərə və 44 günlük Vətən müharibəsində xalqımızın parlaq Zəfərinə həsr olunmuş sənədli filmlər nümayiş etdirilib.
Azərbaycanın Niderlanddakı səfiri Rəhman Mustafayev, Niderland-Belçika Azərbaycanlıları Koordinasiya Şurasının koordinatoru Elxan Mirhəşimli, Amsterdamdakı Yunus Əmrə İnstitutunun direktoru Adil Akaltun, Əsir və itkin düşmüş, girov götürülmüş vətəndaşlarla əlaqədar Dövlət Komitəsinin işçi qrupunun üzvü Emin Ağayev, “Ana Vətən” Avropa Azərbaycanlı Qadınlar Birliyinin sədri Mayisə Ağamirzəyeva çıxış edərək, Azərbaycan Bayrağının Qarabağın bütün şəhər və kəndlərində dalğalandırılması münasibətilə soydaşlarımıza və Türk dünyasına təbriklərini çatdırıblar. Səfir və diaspor nümayəndələri Niderlandda yaşayan Azərbaycan vətəndaşlarını 2024-cü il fevralın 7-də ölkəmizdə keçiriləcək növbədənkənar prezident seçkilərində fəal iştirak etməyə çağırıblar.
Azərbaycanın Niderlanddakı səfirliyi və “Ana Vətən” Avropa Azərbaycanlı Qadınlar Birliyi adından son illərdə fəallığı ilə seçilən Koordinasiya Şurasının üzvlərinə və diaspor fəallarına təşəkkürnamələr təqdim olunub.
“Yaşa Azərbaycan” mahnısı ilə başlayan konsert proqramında gənc müğənnilər İlqar Sadıqov, Vüsalə Cabir, Niderland-Azərbaycan “Odlar Yurdu” Cəmiyyətinin rəhbəri Firəngiz Bağırova və cəmiyyətin üzvü Nemətağa Əliyev milli mahnılamızı ifa ediblər.
Konsertdən toplanan vəsait Azərbaycandakı şəhid və qazi ailələrinə ianə ediləcək.
Bölmənin digər xəbərləri
