Rövşən Hüseynli: Çempionata hazır getməliyik ki, irəliləmək şansımızı qaçırmayaq
Bakı, 19 oktyabr, AZƏRTAC
Sayca altıncı dəfə bu mötəbər yarışda iştirak edəcəyik. Final mərhələsində ilk oyunumuzu Gürcüstan millisinə qarşı keçirəcəyik. Daha sonra yaxından tanıdığımız İspaniya və Bosniya və Herseqovina yığmaları ilə qarşılaşacağıq.
AZƏRTAC xəbər verir ki, bunu gələn il Niderlandda keçiriləcək Avropa çempionatının final mərhələsində iştirak edəcək millimizin qapıçısı Rövşən Hüseynli komandamızın yer aldığı qrupla bağlı danışarkən deyib.
Qapıçı deyib: “Gürcüstan bu mərhələyə yüksəlmək üçün Rusiya və Fransa kimi iddialı komandalarla bir qrupda mübarizə aparıb və ikinci yerin sahibi kimi işinin öhdəsindən gəlməyi bacarıb. Heyətlərində braziliyalı futzalçılar da yer alır. Fərdi keyfiyyətlərinə görə seçilən oyunçulardandır. Debüt etsələr də, güclü rəqibdir. Ümumiyyətlə, bu mərhələdə iştirak edən hansısa komandaya yuxarıdan aşağı baxmaq olmaz. Biz dəfələrlə belə yarışlarda iştirak etdiyimizdən təcrübəmiz çoxdur. İllərlə qazandığımız bu təcrübədən faydalanmalıyıq, yaxşı hazırlaşmalıyıq”.
Futzalçı qeyd edib ki, İspaniya haqda geniş danışmağa dəyməz. Bu komanda iştirak etdiyi bütün turnirlərdə favoritlər sırasında yer alır. Amma ispanlara qarşı hər zaman layiqli mübarizə aparmışıq. Hətta 4 il əvvəlki qitə birinciliyində bir qrupda yer almışdıq. Həmin vaxt 1 top fərqi ilə yenildik. Halbuki həmin qarşılaşmada qələbə qazanmaq üçün imkanlarımız az olmadı. Ümid edirəm ki, bu dəfə daha yaxşı oyun nümayiş etdirib, lazım olan nəticəni qazanacağıq. Bosniya və Herseqovina ilə 2017-cı ildə qarşılaşmışıq. Bu görüş Bakıda keçirilmişdi. Çox ağır oyun oldu. 5:4 hesabı ilə qələbə qazandıq. Hündürboylu oyunçulara sahib idilər. Fərqli oyun üslubuna malik komandadır. Düzdür, bizə qarşı oynayan heyətdə çox dəyişiklik edilib. Üstəlik, onlar da qrup lideri kimi final mərhələsinə vəsiqə qazandılar, Serbiya, Rumıniya kimi komandaları geridə buraxdılar.
Qarşıda 3 aya yaxın vaxtlarının olduğunu deyən futzalçı qeyd edib ki, bu müddət ərzində yaxşı hazırlıq keçməli, yoldaşlıq oyunlarında gücümüzü sınamalı, zəif tərəflərimizi düzəltməliyik. Çempionata hazır getməliyik ki, irəliləmək şansımızı qaçırmayaq. Həm də nəzərə almalıyıq ki, bu dəfə qrupda 3 yox, 4 komanda yer alacaq. Əvvəl, bəzən 1 xalla da növbəti mərhələyə yüksəlmək mümkün idi. Bu dəfə belə olmayacaq.
Qeyd edək ki, millimiz mübarizəyə yanvarın 22-də start verəcək. Yığmamızın ilk rəqibi Gürcüstan seçməsi olacaq. Futzalçılarımız yanvarın 26-da İspaniya, üç gün sonra isə Bosniya və Herseqovina komandası ilə üz-üzə gələcəklər. Millimizin oyunları Niderlandın Qroningen şəhərində keçiriləcək.
Bölmənin digər xəbərləri
