Rumıniya Avropa müdafiə zəncirinə qoşula bilər
Buxarest, 16 fevral, AZƏRTAC
Rumıniya Avropa İttifaqının müdafiə sənayesi istehsal zəncirinə qoşulmaq üçün real imkanlara malikdir.
AZƏRTAC xəbər verir ki, bunu Rumıniyanın milli müdafiə naziri Radu Mirutsa bildirib.
Onun sözlərinə görə, Rumıniyanın İttifaqın müdafiə zəncirinə qoşulması ölkənin həm texnoloji potensialını artıracaq, həm də Aİ-nin ümumi təhlükəsizlik arxitekturasına töhfə verəcək.
Nazir qeyd edib ki, Brüsseldə aparılan müzakirələr çərçivəsində Rumıniya müdafiə sənayesinin Avropa istehsal sisteminə inteqrasiyası istiqamətində irəliləyiş mümkündür. Bu proses ölkənin sənaye imkanlarının genişlənməsi və yeni investisiyaların cəlb olunması baxımından da əhəmiyyətli hesab olunur.
Radu Mirutsa, eyni zamanda, hibrid təhlükələrə diqqət çəkərək bildirib ki, müasir dövrdə təhlükəsizlik yalnız hərbi avadanlıqla məhdudlaşmır. Dezinformasiya və informasiya manipulyasiyası kimi amillər də ciddi risk yaradır və bu istiqamətdə koordinasiyalı yanaşma vacibdir.
Qeyd edək ki, Rumıniyanın Avropa müdafiə zəncirinə mümkün inteqrasiyası həm strateji təhlükəsizlik, həm də sənaye inkişafı baxımından mühüm perspektiv kimi qiymətləndirilir.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
