Rusiya və Belarus idman ictimaiyyətinin nümayəndələri ilə görüş
Bakı, 13 iyun, AZƏRTAC
İyunun 13-də Qafqaz Müsəlmanları İdarəsinin (QMİ) sədri şeyxülislam Allahşükür Paşazadə ölkəmizdə səfərdə olan Rusiya Federasiyası və Belarus Respublikasının idman ictimaiyyətinin rəhbər şəxsləri ilə görüşüb.
QMİ-nin mətbuat xidmətindən AZƏRTAC-a bildirilib ki, Rusiyanın Cüdo Federasiyasının prezidenti Sergey Soloveyçik və Belarus Gimnastika Federasiyasının Rəyasət heyətinin sədri Yelena Skripeli səmimi salamlayan şeyxülislam A.Paşazadə onlara səfərlərində və fəaliyyətlərində uğurlar diləyib.
Azərbaycana səfərlərindən və ölkələrinin dini liderlərinin tövsiyəsi ilə şeyxülislamla görüşdən məmnunluqlarını ifadə edən qonaqlar bildiriblər ki, istər Rusiyada, istərsə də Belarusda şeyxülislam A.Paşazadənin dini lider məqamında fəaliyyəti yüksək dəyərləndirilir. Rusiyalı və belaruslu ictimai xadimlər hər iki ölkənin xristian və müsəlman icmaları, dini liderləri ilə ən xoş münasibətlərə malik QMİ sədri ilə görüşün dost xalqlarımız və dövlətlərimiz arasında münasibətlərin daha da dərinləşməsinə töhfə verdiyini xüsusi vurğulayıblar.
Şeyxülislam A.Paşazadə, öz növbəsində, Rusiya Federasiyası və Belarusun dini liderləri ilə onilliklər ərzində davam edən səmərəli, qarşılıqlı faydalı dini-mənəvi əlaqələrin önəmindən, bu dövlətlərə çoxsaylı səfərlərindən, dövlət rəhbərləri ilə görüşlərindən, dövlət təltiflərinə layiq görülməsindən, birgə tədbirlərdə iştirakından ətraflı danışıb. QMİ sədri Rusiya Federasiyasının müxtəlif subyektləri, xüsusən, Şimali Qafqaz Respublikaları ilə dini-mənəvi müstəvidə unikal əlaqələrin mövcudluğundan məmnunluqla söhbət açıb.
Belarus Gimnastika Federasiyasının Rəyasət heyətinin sədri Yelena Skripel Belarusun müsəlman din xadimi A.Şabanoviçin səmimi qardaş salamlarını və Belarusa dəvət məktubunu şeyxülislam A.Paşazadəyə çatdırmaqdan şərəf duyduğunu bildirib. Azərbaycanın dini liderini Belarusda görməkdən məmnun olacaqlarını ifadə edib.
Şeyxülislam A.Paşazadə Belarus xalqına və dövlətinə, onun siyasi liderinə ehtiramını ifadə edib və hər zaman bu ölkəni ziyarət etməkdən məmnun olacağını bildirib və oradakı müsəlman icması və soydaşlarımızla görüşlərini yüksək dəyərləndirib.
Səmimi görüşün sonunda xatirə hədiyyələri təqdim olunub.
Bölmənin digər xəbərləri
