Rusiya Xarici İşlər Nazirliyi ATƏT-in Minsk qrupunun buraxılmasının zəruri olduğunu bəyan edib
Moskva, 17 aprel, AZƏRTAC
ATƏT-in Minsk qrupu aktuallığını itirib və buraxılmalıdır.
AZƏRTAC xəbər verir ki, Rusiya Xarici İşlər Nazirliyinin rəsmi nümayəndəsi Mariya Zaxarova Azərbaycanın tələblərinə uyğun olaraq ATƏT-in Minsk qrupunu buraxmağa çağıran Ermənistanın baş nazirinin bəyanatına Moskvanın necə münasibət bəsləməsi ilə bağlı sualı cavablandırarkən belə deyib.
Rusiya Xarici İşlər Nazirliyinin nümayəndəsinin sözlərinə görə, ATƏT-in Minsk konfransının Dağlıq Qarabağın nizamlanması üzrə həmsədrinin ATƏT tərəfindən təsdiq edilmiş mandatı aktuallığını itirib.
“Müvafiq olaraq, nəticədə Minsk konfransının bütün strukturları – Minsk qrupu, Yüksəksəviyyəli planlaşdırma qrupu və ATƏT-in indiki sədrinin Dağlıq Qarabağ nizamlanması üzrə şəxsi nümayəndəsi vəzifəsi – bütün bunlar buraxılmalıdır”, - deyə o qeyd edib.
“Biz öz tərəfimizdən bundan sonra da sülh müqaviləsinin imzalanması yolunda qalan maneələrin aradan qaldırılmasında, nəqliyyat və iqtisadi kommunikasiyaların açılmasında, Ermənistan-Azərbaycan dövlət sərhədinin delimitasiyası və humanitar məsələlərin həllində tərəfdaşlarımıza köməyi davam etdirmək niyyətindəyik”, - deyə M.Zaxarova vurğulayıb.
O əlavə edib ki, Moskva üçtərəfli məsələlərin bütün spektri, o cümlədən sülh müqaviləsinin bağlanması üzrə Azərbaycan və Ermənistan nümayəndələri arasında danışıqlar üçün Rusiya platforması təqdim etməyə hazır olduğunu təsdiqləyir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
