Rusiyada miqrantlara elektron daşıyıcısı olan vahid sənəd verilməsi təklif edilir
Moskva, 9 iyul, AZƏRTAC
Rusiyada miqrantlara elektron daşıyıcısı olan vahid sənəd verilməsi təklif edilir.
AZƏRTAC xəbər verir ki, Rusiya Daxili İşlər Nazirliyinin (DİN) hazırladığı yeni qanun layihəsində miqrantlara 10 il müddətinə elektron daşıyıcısı olan vahid sənədin verilməsi təklifi yer alıb.
Sənədə əsasən, Rusiyada yaşayan əcnəbi vətəndaşlar şəxsiyyətlərini təsdiq edən bu sənədi federal icra hakimiyyəti orqanlarının ərazi bölmələrindən icbari daktiloskopiyadan keçdikdən və şəkil çəkdirdikdən sonra almalıdırlar. Eyni zamanda, miqrantlar infeksion xəstəliklərinin olmaması, narkotik vasitələrdən istifadə etməməsi barədə arayış, tibbi sığorta haqqında sənəd təqdim etməlidirlər.
Qanun layihəsində Rusiya DİN əcnəbilərin ölkədə müvəqqəti qalmasına icazənin ləğv olunmasını təklif edir. Təklifə görə, əcnəbilərin Rusiyada qalmasının üç rejimi tətbiq edilməlidir: qısamüddətli (bir il ərzində cəmi 90 gün), uzunmüddətli (daimi yaşayış haqqında sənəd almadan 90 gündən artıq) və daimi yaşayış (müddətsiz). Əmək miqrasiyasının əcnəbi işçilərin reyestri və işəgötürənlərin elektron reyestri ilə tənzimlənməsi də təkliflər sırasındadır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
