Rusiyada parlament seçkilərində 11 siyasi partiya iştirak edəcək
Moskva, 10 iyul, AZƏRTAC
2026-cı ilin sentyabrında keçiriləcək Rusiya Dövlət Duması seçkiləri üçün federal seçki bülletenində cəmi 11 siyasi partiya təmsil olunacaq.
AZƏRTAC xəbər verir ki, bu barədə Rusiya Federasiyası Mərkəzi Seçki Komissiyasının sədri Ella Pamfilova MSK-nın iclasında bildirib.
O qeyd edib ki, siyasi partiyalar namizədlərin irəli sürülməsi üçün 11 iyuldan gec olmayaraq qurultaylar keçirə bilərlər, lakin tədbir keçirmək niyyətləri barədə Mərkəzi Seçki Komissiyasına ən azı iki gün əvvəl məlumat verilməlidir.
“İyulun 9-da başqa müraciətlər almadığımız üçün hesab edirik ki, bu 11 partiya hazırda qarşıdan gələn kampaniya ilə bağlı bütün tədbirlərdə iştirak edir. Bülletenlərdə mütləq 11-dən çox partiya olmayacaq”, - deyə Pamfilova bildirib.
Artıq beş parlament partiyası, o cümlədən “Vahid Rusiya”, Rusiya Federasiyası Kommunist Partiyası, Rusiya Liberal Demokrat Partiyası, “Yeni insanlar” və “Ədalətli Rusiya” partiyaları, həmçinin altı qeyri-parlament partiyası – “Yaşıllar”, “Rodina”, “Yabloko”, Təqaüdçülər Partiyası, Birbaşa Demokratiya Partiyası və “Rusiya Kommunistləri” seçkiqabağı qurultaylar keçirib.
Bununla yanaşı, 11 partiyanın hamısının imza toplamadan namizədləri qeydiyyata almaq hüququ var.
Bölmənin digər xəbərləri
