Sabirabadda 20 Yanvar faciəsinin 22-ci ildönümü qeyd olunmuşdur
Sabirabad, 20 yanvar (AZƏRTAC). Ümumxalq hüzn günündə Sabirabad şəhərindəki Şəhidlər xiyabanında keçirilən anma mərasimində 20 Yanvar faciəsi qurbanlarının xatirəsi ehtiramla yad edilmişdir.
AZƏRTAC xəbər verir ki, mərasimdə çıxış edən rayon icra hakimiyyətinin başçısı Nazim İsmayılov 1990-cı il yanvarın 20-də keçmiş sovet ordusunun Bakı şəhərində günahsız insanlara qarşı törətdiyi qanlı faciədən danışmış, 20 Yanvar hadisələrinə siyasi-hüquqi qiymətin verilməsini ümummilli lider Heydər Əliyevin xalqımız qarşısında əvəzsiz xidmətlərindən biri kimi qiymətləndirmişdir.
Qeyd olunmuşdur ki, 1990-cı il yanvarın 20-də Sabirabad rayonunun 2 sakini-Mehman Məmmədov və Zeybulla Əliyev öz həyatlarını müstəqilliyimiz uğrunda qurban vermiş şəhidlər arasında olmuşdur.
Şəhidlər xiyabanında uyuyan Milli Qəhrəman Fərhad Ağayevin atası İslam Ağayev bildirmişdir ki, müqəddəs amallar uğrunda şəhid olanların ömrü Vətənin və xalqın ömrü qədərdir. Mən Vətənimizin azadlığı uğrunda canını fəda etmiş oğlumla fəxr edirəm.
Saat 12:00-da rayonun bütün ərazisində 20 Yanvar şəhidlərinin xatirəsi bir dəqiqəlik sükutla yad edilmiş, avtomobillərdən səs siqnalları verilmişdir.
Bölmənin digər xəbərləri
