Sakit Məmmədov: Məqsədimiz Türk dünyası rəssamlarını dünyaya daha yaxından tanıtmaqdır
İstanbul, 13 noyabr, Günel Karatepe, AZƏRTAC
İstanbulda türkdilli dövlətlərin tanınmış rəssamlarının Türkiyə xalqının böyük lideri Qazi Mustafa Kamal Atatürkün Anım Gününə həsr olunan sərgisi açılıb.
AZƏRTAC xəbər verir ki, Azərbaycanın Xalq rəssamı, Türk Dünyası Rəssamlar Akademiyasının prezidenti professor Sakit Məmmədovun kuratorluğu ilə baş tutan sərgidə türkdilli dövlətlərdən 12 rəssamın 106 əsəri nümayiş etdirilir.
Sərginin açılışında Türkiyə ictimaiyyətinin nümayəndələri, Azərbaycanın qardaş ölkədə fəaliyyət göstərən dövlət qurumlarının təmsilçiləri, eləcə də çox sayda sənətsevər iştirak edib.
Bununla bağlı AZƏRTAC-a müsahibə verən Sakit Məmmədov akademiyanın yaranması və fəaliyyət istiqamətləri barədə danışıb.
Artıq uzun zamandır Türk dünyası rəssamlarını bir araya gətirərək, onların sərgilərini təşkil etdiyini bildirən Sakit Məmmədov deyib: “Üç il əvvəl bizim Özbəkistan Rəssamlıq Akademiyasında geniş görüşümüz oldu. Orada türkdilli dövlətlərin birgə rəssamlıq akademiyasının yaradılması ilə bağlı qərar verdik. Rusiyada belə akademiya hələ XVIII əsrdə yaranıb. Nəhayət ki, biz də bu arzumuza bu il İstanbulda baş tutan böyük bir toplantı ilə nail olduq. Fikrimcə bu, çox mühüm bir hadisədir. Bir neçə gün əvvəl Xalq rəssamları da daxil olmaqla, altı türkdilli dövlətin hər birindən on professorun iştirakı ilə akademiya təsis edildi və yekdilliklə məni akademiyanın həm İdarə Heyətinin sədri, həm də prezidenti seçdilər. Akademiyamız fəaliyyətə başlayıb və artıq 12 rəssama akademik ünvanı vermişəm. Onlardan beşi fəxri, digərləri isə akademiyanın həqiqi üzvü adını alıblar”.
Akademiyanın ilk sərgisinin türk ədəbiyyatının görkəmli nümayəndəsi Çingiz Aytmatovun xatirəsinə həsr olunduğunu və İstanbulun ən mötəbər məkanlarından olan Zorlu Performans Sənətləri Mərkəzində “Ulu bozqırın ruhu” mövzusunda açdıqlarını xatırladan Xalq rəssamı sözlərinə belə davam edib: “Bu, ikinci sərgimizdir və çox böyük maraq doğurduğunu görürük. Növbəti sərgimizi dekabr və ya yanvar aylarında Azərbaycanda keçirəcəyəm. Bakıda olacaq sərgidə də bir neçə rəssama akademik adının verilməsi nəzərdə tutulur. Artıq akademiyanın qızıl medal və diplomları hazırlanıb və gələcəkdə tanınmış rəssamlara təqdim ediləcək. Yəni, çox gözəl planlarımız var”.
Bundan əvvəl Türkiyə, Macarıstan, Özbəkistan, Qırğızıstan kimi bir çox ölkədə bir neçə dəfə sərgi açdığını qeyd edən professor bildirib ki, bu sərgiyə də Türk dünyasının ən tanınmış rəssamları dəvət edilib: “Bundan sonra Böyük Britaniya, Almaniya və ABŞ-da sərgilər təşkil edəcəyəm. Burada əsas məqsəd akademiyanın vasitəsilə Türk dünyası rəssamlarını dünyaya daha yaxından tanıtmaqdır. Sərgilərimizdən birini də Türk dünyasının dahi insanlarına həsr etməyi düşünürəm. Məqsədimiz Türk dünyasının tanınmış rəssamlarının adlarının əbədiləşdirilməsi, kölgədə qalan və yaxud yaş baxımında artıq fəaliyyət göstərə bilməyən bəzi sənətkarlarımızı üzə çıxarmaqdır”.
Oktyabrda İstanbulda Avropa Senatının Zirvə toplantısının keçirildiyini deyən Xalq rəssamı söyləyib ki, Avropa Senatının fəxri Senatoru olaraq bu toplantıda iştirak edib: “Oradakı geniş çıxışımda həm Azərbaycanın, həm Türk dünyası rəssamlarını əhatə etdim. Hər tədbirdə əsas vurğunu öz Vətənimə edirəm və hər dəfə də Azərbaycanın Qafqazın mədəniyyət paytaxtı olduğunu deyirəm. Azərbaycanın mədəniyyət xadimi olduğum üçün fəxr edirəm və öz mədəniyyətimizi dünyaya göstərməyə çalışıram. Akademiyanın prezidenti olaraq Türk dünyası rəssamlarının dünyada tanınmasını təşkil etmək üçün əlimdən gələni edəcəyəm”.
Bölmənin digər xəbərləri
