-Əziz salyanlılar!

Əziz dostlar!

Əziz idmançılar!

Bu gün Salyan rayonunun həyatında çox əlamətdar bir gündür. Salyanda gözəl Olimpiya İdman Kompleksi istismara verilir. Mən bu münasibətlə sizin hamınızı ürəkdən təbrik edirəm.

Mən xatırlayıram, iki il bundan əvvəl Salyanda olarkən kompleksin tikintisi ilə tanış olmuşdum və o vaxt demişdim ki, bu gözəl idman qurğusu dünyanın ən yüksək standartlarına cavab verməlidir. Bu gün kompleksin bütün elementləri ilə tanış olarkən bir daha gördüm ki, doğrudan da bu, belədir. Burada idmanla məşğul olmaq üçün çox gözəl imkanlar var, ən müasir şərait, dörd açıq meydança, böyük stadion, idman zalı, hovuz, digər zallar var. Yəni bu kompleksdə həm beynəlxalq yarışların keçirilməsi mümkündür, həm də yerli idmançıların məşqləri üçün, təlim-məşq toplanışlarının keçirilməsi üçün bütün şərait vardır.

Bildiyiniz kimi, Azərbaycanda olimpiya idman komplekslərinin tikintisi çox geniş vüsət alıbdır. Ölkəmizin müxtəlif bölgələrində belə gözəl idman obyektləri tikilir. Son illər ərzində 13 idman kompleksi istismara verilmişdir. Salyan idman kompleksi 14-cüdür və növbəti illərdə 20-dən çox olimpiya kompleksi tikiləcəkdir. Bu, sadəcə olaraq, idman infrastrukturu deyil, eyni zamanda, turizmin inkişafı üçün, rayonların inkişafı üçün gözəl şərait yaradır. Burada gözəl mehmanxana və digər qurğular tikilibdir. Yəni bir sözlə, burada idmanla məşğul olmaq üçün, peşəkar idmançılar üçün və eyni zamanda, Salyan rayonunun sakinləri üçün hər cür şərait vardır. Mən çox istəyirəm ki, Azərbaycanda istismara verilmiş bütün yeni idman qurğularında daimi proses getsin, yəni uşaqlar, gənclər burada idman bölmələrində məşq eləsinlər, öz fiziki hazırlıqlarını daha da yüksək səviyyəyə qaldırsınlar.

Bildiyiniz kimi, Azərbaycanda idman çox böyük addımlarla inkişaf edir. Azərbaycan idman ölkəsidir, idman dövlətidir. Bizim beynəlxalq yarışlarda gözəl nəticələrimiz var, idmanın kütləviliyi geniş hal alır və biz bu məsələyə də çox böyük diqqət göstərməliyik. İdmanın kütləviliyi insanlarda idmana daha da böyük marağın yaranmasına gətirib çıxaracaq, uşaqlar daha da sağlam olacaqlar. Fiziki cəhətdən sağlam olan insan, mənəvi cəhətdən də sağlam olur. Beləliklə, Azərbaycanda gənc nəsil - uşaqlar, gənclər fiziki cəhətdən daha da güclü olacaqlar.

Əlbəttə, idmanın kütləviliyi hər bir ölkənin inkişafının əlamətidir. İnkişaf etmiş ölkələrdə bu, daha da geniş xarakter alır. Azərbaycan da bu yolu seçibdir. Bütün istiqamətdə atılan addımlar, görülən tədbirlər ölkəmizin hərtərəfli inkişafı üçün şərait yaradır. Biz çox yüksək sürətlə inkişaf edirik. Sosial məsələlərin həlli, - idman da bu istiqamətdə çox vacib bir amildir, - əlbəttə, böyük əhəmiyyət daşıyır. İdmanın kütləviliyini daha da böyük dərəcədə təmin etmək üçün, əlbəttə ki, bizim idman qələbələrimiz də olmalıdır və çox şadam ki, bu, var. İdmançılarımız son illər ərzində müxtəlif beynəlxalq yarışlarda böyük nailiyyətlər, uğurlar qazanmışlar. Bu gün bizimlə bərabər burada Pekin Olimpiya oyunlarının qalibləri də iştirak edirlər. Həm Pekin, həm Sidney, həm Afina, həm də Barselona Olimpiya oyunlarında Azərbaycanı təmsil edən, bizim idman şöhrətimizi yüksəklərə qaldıran insanlar, Azərbaycanın dövlət bayrağını yüksəklərə qaldıran idmançılarımız buradadırlar. Onların uğurlu çıxışları, o cümlədən Pekin Olimpiya oyunlarında böyük qələbə qazanmaları, əlbəttə ki, bizim hamımızı ruhlandırır və ilk növbədə, uşaqları idmanla məşğul olmağa daha da çox sövq edir. Mən əminəm ki, onların nümunəsi, qələbələri bütün gənc idmançılar üçün də bir örnəkdir. Mən şübhə etmirəm ki, bu böyük qələbədən sonra idman bölmələrinə uşaqların axını daha da sürətli olacaqdır. Biz bunu müşahidə edirik. Biz görürdük ki, əvvəlki Olimpiya oyunlarından sonra, qazanılmış qələbələr nəticəsində idman bölmələrinə uşaqların axını daha da sürətli olur. İndi idmanla məşğul olmaq üçün, demək olar ki, Azərbaycanın bütün bölgələrində gözəl şərait var. Bax, bu olimpiya kompleksinin timsalında biz bunu görürük. Biz görürük ki, bizim çox güclü idman infrastrukturumuz yaradılır.

Bu Olimpiya İdman Kompleksində istənilən beynəlxalq yarışları da keçirmək mümkündür. Yəni indi Azərbaycanın bütün imkanları var ki, biz ən mötəbər beynəlxalq yarışları ölkəmizdə keçirək. Biz bunu edirik. Artıq dünya, Avropa çempionatları Azərbaycanda keçirilir və gələcəkdə belə imkanlar daha da geniş olacaqdır. Yəni, bir sözlə, bir daha demək istəyirəm ki, bu olimpiya idman komplekslərinin tikilməsi çox əlamətdar bir hadisədir və bir neçə məqsədi güdür: idmanın kütləviliyini təmin etmək, müasir idman və turizm infrastrukturunun yaradılması, təlim-məşq toplanışlarının keçirilməsini. Eyni zamanda, mən istərdim ki, Salyan rayonunun sakinləri də bu idman kompleksinin imkanlarından səmərəli istifadə etsinlər, burada idmanla məşğul olsunlar və öz sağlamlıqlarını daha da möhkəmləndirsinlər.

Deyə bilərəm ki, bütünlükdə son illər ərzində bu istiqamətdə görülən işlər məni çox sevindirir. Bizim gələcək fəaliyyət üçün də konkret planlarımız, proqramlarımız var. Bütövlükdə Salyanın inkişafına böyük diqqət göstərilir. Rayonun iqtisadi, sənaye potensialı artır, yeni müəssisələr yaradılır. Mənə verilən məlumata görə, son dörd il ərzində rayonda 10 mindən çox yeni iş yeri açılmışdır. Beləliklə, insanlar daha da yaxşı yaşamağa başlamışlar.

Salyanda sosial məsələlərin həlli sürətlə gedir. Mən bu gün səhər kənd məktəbinin açılışında iştirak edirdim və gördüm ki, çox yüksək səviyyədə tikilibdir. Bu da Dövlət proqramının tərkib hissəsidir. Azərbaycanın bütün bölgələrində yeni məktəblər tikilir. Son dörd il ərzində 1400 yeni məktəb tikilmişdir və bu proses sürətlə davam etdirilir. Mənə verilən məlumata görə, indi Salyanda bütün məktəblərdə kompyuter sinifləri yaradılmışdır. Biz kompyuterləşmə proqramını, demək olar ki, çox uğurla başa çatdırırıq. Bu, bir tərəfdən onu göstərir ki, dövlət siyasəti çox məqsədyönlüdür, digər tərəfdən, biz onun nəticəsini təhsilin keyfiyyətinin artmasında görürük. Bu məsələlər bir-biri ilə çox bağlıdır. Güclü sosial infrastruktur, eyni zamanda, tərəqqiyə, inkişafa gətirir.

Salyanda son illər ərzində 12 yeni məktəb tikilmişdir. Bir neçə məktəbdə əsaslı təmir işləri aparılmışdır və tikilməkdə olan məktəblər də var. Əlbəttə ki, gələcəkdə bu siyasət davam etdiriləcəkdir. Azərbaycanda bir dənə də yararsız, yaxud da qəza vəziyyətində məktəb olmamalıdır, olmayacaqdır. Dörd ildə 1400 məktəbin tikilməsi bunun əyani sübutudur. Mən əminəm ki, növbəti 3-4 il ərzində Azərbaycanda bütün məktəb infrastrukturu dünyanın ən yüksək standartlarına cavab verəcəkdir.

Salyan rayonunda sosial məsələlərin həlli üçün başqa tədbirlər də görülür. Mən xatırlayıram, keçən dəfə Salyanda olanda rayon xəstəxanası ilə tanış olmuşdum və gördüm ki, vəziyyət o qədər də ürəkaçan deyildir. Xəstəxana, demək olar ki, yararsız vəziyyətə düşmüşdü. Bu gün mənə məlumat veriblər ki, artıq əsaslı təmir işləri tam başa çatıb və ən yüksək dünya səviyyəsindədir. Mən bu gün o xəstəxana ilə tanış olacağam. Bax, budur Azərbaycanın reallıqları. Azərbaycan vətəndaşları yaxşı şəraitdə yaşamalıdırlar, uşaqlar yaxşı məktəblərdə oxumalıdırlar, yaxşı tibbi xidmət göstərilməlidir, infrastruktur yaradılmalıdır, yeni iş yerləri açılmalıdır. Azərbaycanın iqtisadiyyatı çoxşaxəli olmalıdır və biz bu məqsədlərə çatırıq.

Bu gün Bakıdan gələrkən paytaxtı Salyanla birləşdirən yolun tikintisinə də nəzər saldım. Bu yol ən müasir səviyyədədir, Azərbaycan-İran sərhədinə qədər gedəcəkdir. Bu, insanlara rahatlıq gətirəcəkdir. Yol olan yerdə inkişaf da olur. Beləliklə, Azərbaycanın inkişafı uzunmüddətli, dayanıqlı olacaqdır və Azərbaycan xalqına böyük uğurlar gətirəcəkdir.

Mən bir daha demək istəyirəm ki, biz iqtisadi islahatlar aparmaqla ölkəmizin hərtərəfli inkişafına nail ola bilmişik. Biz bu gün kənd təsərrüfatına böyük diqqət göstəririk və kənd təsərrüfatı istehsalı ildən-ilə artır. Bu günlərdə Bakıda Azərbaycanda istehsal olunan məhsulların sərgisi keçirilirdi. Mən sərgi ilə tanış oldum. Bilirdim və bir daha gördüm ki, demək olar, ərzaq məhsullarının böyük əksəriyyəti ilə özümüzü təmin edirik. Əvvəllər biz daha çox idxaldan asılı idik. Azərbaycanda strateji xarakter daşıyan bir çox ərzaq məhsulları xaricdən gətirilirdi. Biz indi özümüzü kənd təsərrüfatı məhsulları ilə 90-95 faiz səviyyəsində təmin etməyə nail ola bilmişik. Cəmi 4-5 il ərzində buna nəyin hesabına nail ola bilmişik?! Məqsədyönlü iqtisadi islahatlar, sahibkarlığın dəstəklənməsi, fermerlərə güzəştli kreditlərin verilməsi, ölkəmizdə liberallaşma siyasətinin aparılması, sahibkarlara dövlət tərəfindən həm maddi, həm də mənəvi, siyasi dəstəyin verilməsi, “Aqrolizinq” Səhmdar Cəmiyyətinin yaradılması, gübrənin, yanacağın fermerlərə güzəştli şərtlərlə verilməsi sayəsində. Azərbaycanda fermerlərə hər il 100 milyon dollar həcmində güzəştli kreditlər verilir. Bax, budur dövlət tərəfindən görülən əsas işlər. Əlbəttə ki, bununla bərabər, elektrik xətləri, yollar çəkilir və digər infrastruktur obyektləri yaradılır. Bu, Azərbaycanın qeyri-neft sektorunun inkişafına böyük təkan vermişdir. Əgər Azərbaycan uzun illər, əsrlər boyu neft ölkəsi kimi tanınırdısa, XXI əsrdə özünü müasir, inkişaf etmiş ölkə kimi tanıtdıracaqdır. Bunu deməyə əsas var. Son illər ərzində aparılan çox ciddi iqtisadi islahatlar öz bəhrəsini verməkdədir.

Mən şübhə etmirəm ki, ölkəmizin gələcək inkişafı da uğurlu olacaqdır və hər bir rayonda abadlıq işləri aparılacaq, sosial infrastrukturun yaradılması və müasirləşdirilməsi üçün işlər görüləcək və insanların rahat yaşaması üçün lazımi tədbirlər görüləcəkdir.

Mən çox şadam ki, Salyan rayonunun iqtisadi göstəriciləri də çox yaxşıdır. Burada istehsal olunan məhsulların ümumi həcmi artır, yeni iş yerləri açılır. Rayonun infrastrukturunun möhkəmləndirilməsi üçün Azərbaycan dövləti bundan sonra da səy göstərəcəkdir. Gələn ilin əvvəlində qəbul ediləcək regionların sosial-iqtisadi inkişafına dair növbəti Dövlət proqramında bütün rayonların problemləri öz əksini tapacaqdır. O cümlədən, Salyan rayonunun növbəti beş il ərzində uğurlu inkişafı üçün nəzərdə tutulan əməli-praktik tədbirlər orada göstəriləcəkdir.

Əziz salyanlılar!

Əziz dostlar!

Əziz idmançılar!

Bu gözəl Olimpiya İdman Kompleksinin açılışı münasibətilə sizi bir daha ürəkdən təbrik edirəm. Sizə cansağlığı, uğurlar arzulayıram.

######