Salyanlılar 20 Yanvar faciəsi qurbanlarının xatirəsini dərin hüznlə yad etmişlər
Salyan, 20 yanvar (AZƏRTAC). Yanvarın 20-də salyanlılar “Şəhidlər” abidə kompleksinin önündə keçirilən mərasimdə qanlı 20 Yanvar faciəsi qurbanlarının xatirəsini dərin hüznlə yad etmişlər.
AZƏRTAC xəbər verir ki, Salyan Rayon İcra Hakimiyyətinin başçısı Tahir Kərimov, idarə, müəssisə və təşkilatların rəhbərləri, müharibə veteranları, gənclərin və ictimaiyyətin nümayəndələri, şəhər əhalisi abidə kompleksinin önünə əklillər və gül dəstələri düzərək ölkəmizin azadlığı və ərazi bütövlüyü uğrunda şəhid olanların xatirəsini anmışlar. Burada şəhidlərin ruhuna dualar oxunmuşdur.
Mərasim iştirakçıları qanlı 20 Yanvar gecəsində şəhid olmuş Elçin İmanovun məzarını da ziyarət etmişlər.
Tədbir Salyan Kukla Teatrında davam etmişdir. Teatrın aktyorlarının ifasında 20 Yanvar faciəsinin dəhşətlərini əks etdirən “Şəhidlər unudulmur” adlı ədəbi-bədii kompozisiya nümayiş etdirilmişdir.
Yanvarın 20-də rayonda matəm əlaməti olaraq Azərbaycanın dövlət bayraqları endirilmiş, Bakı vaxtı ilə saat 12.00-da 20 Yanvar şəhidlərinin əziz xatirəsi bir dəqiqəlik sükutla yad edilmiş, avtomobillərdən səs siqnalları verilmişdir.
Bölmənin digər xəbərləri
