SANKT-PETERBURQDA “BAKI” RESTORAN-MUZEYİ AÇILACAQ
Rusiyada Azərbaycan ili çərçivəsində yaxın vaxtlarda Sankt-Peterburqun mərkəzində “Bakı” restoran-muzeyi açılacaqdır. Gənclər, İdman və Turizm Nazirliyinin Baş turizm idarəsindən AZƏRTAC-ın müxbirinə bildirmişlər ki, restoranın açılışında nazirliyin nümayəndə heyəti, habelə qurumun Milli Kulinariya Mərkəzinin mütəxəssisləri iştirak edəcəklər. Onlar qonaqlara və Rusiyanın şimal paytaxtının sakinlərinə Azərbaycan mətbəxinin ləziz xörəklərini təqdim edəcəklər. Dövlətimizin başçısı İlham Əliyev bu ilin yayında Sankt-Peterburqa işgüzar səfəri zamanı Sadovaya küçəsindəki 12 nömrəli binada yerləşən restoranın tikintisi ilə tanış olmuşdu. Milli naxışlarla bəzədilmiş restoran-muzeyin açılışı Azərbaycan və Sankt-Peterburq hökumətləri arasında imzalanmış Protokolda nəzərdə tutulmuşdur.
Həmin günlərdə Sankt-Peterburqda turizm üzrə Azərbaycan-Rusiya biznes forumu da keçiriləcəkdir. Tədbirdə Rusiya biznesinin diqqətini cəlb etmək məqsədi ilə ölkəmizin turizm potensialı təqdim olunacaqdır. Forum çərçivəsində bu sahəyə sərmayə qoyuluşunun perspektivləri barədə ətraflı informasiya verən sərgi təşkil ediləcəkdir.
