Sankt-Peterburqda “Xocalıya ədalət” elmi-praktik konfrans keçiriləcəkdir
Bakı, 21 fevral (AZƏRTAC). Fevralın 25-də Sankt-Peterburqun M.Qorki adına Mədəniyyət Evində Heydər Əliyev Fondunun Rusiya Federasiyasındakı nümayəndəliyinin və Azərbaycanın Sankt-Peterburqdakı baş konsulluğunun birgə təşkilatçılığı ilə “Xocalıya ədalət” elmi-praktik konfrans keçiriləcəkdir.
Azərbaycanın Sankt-Peterburqdakı baş konsulluğunun mətbuat xidmətindən AZƏRTAC-a bildirmişlər ki, burada yaşayan və təhsil alan soydaşlarımızın, bir sıra ali təhsil ocaqlarının müəllimlərinin, ictimaiyyətin, KİV təmsilçilərinin iştirakı ilə keçiriləcək konfransda XX əsrin ən qanlı faciəsi olan Xocalı soyqırımı barədə ətraflı məlumat veriləcəkdir.
Konfransda tanınmış rus yazıçısı, professor Yuri Pompeyevin şəxsi xatirələri əsasında yazılmış “Qarabağ gündəliyi” kitabının təqdimatı da keçiriləcəkdir.
Bundan əlavə, ermənilərin Xocalıda törətdikləri vəhşiliklərini əks etdirən fotosərgi təşkil olunacaq, faciə haqqında sənədli film göstəriləcəkdir.
Konfrans iştirakçılarına Heydər Əliyev Fondu tərəfindən hazırlanmış “Qarabağ həqiqətləri” məlumat toplusu təqdim ediləcəkdir.
Bölmənin digər xəbərləri
